محەمەد حاجی مەحمود ڕایدەگەیەنێت، بارودۆخی عێراق بۆ خراپتر هه‌نگاو ده‌نێت دەشڵێت، موقتەدا سەدر دەیەوێت وەك خاوەن بڕیار و مەرجەع لە عێراق دەربكەوێت.
محەمەد حاجی مەحمود سكرتێری پارتی سۆسیال دیموکراتی کوردستان ڕایگەیاند، له‌و ماوەیه‌دا کێشه و ئاڵۆزی، عێراقی پڕئاشوبی زۆرتر و زۆرتر له‌به‌ریه‌ک ترازاندوە و بێسه‌ره‌وبه‌ری ڕووی له‌و عێراقه کردووە که به‌زۆر لکێنراوە به‌یه‌که‌وە، په‌رله‌مانیش بووە به جێگای گاڵته‌جاڕی و سوکایه‌تیپێکردن.
ترسی ئەوەش نیشاندەدات “جارێکی دیكە پەرلەمانتاران بڕۆنەوە ناو ئەنجومەنی نوێنەران و بڕیاری چاره‌نووسی عێراق بده‌ن”. دەشڵێت، ئه‌وانه‌ی ناو ئەنجومەنی نوێنەران دەستیان بۆ شتێکی ترسناك بردووە، ئه‌ویش “گۆڕینی ده‌ستووری عێراقه کە هه‌ر مادده و به‌ندێکی ده‌ستووری عێراق گه‌ر ده‌ستکاری بکرێت له دژی کورد و کوردستانە، ده‌ستوور به ڕێکه‌وتن نوسراوه و ئه‌گه‌ر به ته‌وافق نەبێت نابێ و ناكرێت بگۆڕێت”.
محەمەد حاجی مەحمود لە نوسینێكیدا ئاماژەی بەوەشداوە، دادگا به‌ربه‌ستێکی دانا کە حکومه‌ت دروستنه‌کرێت به‌بێ 220 ئه‌ندام په‌رله‌مان و ئێستا هه‌مان بڕیار کە ڕێگربوو له‌نێوان موقته‌دا، پارتی و سوننه‌دا، ئێستا له به‌رده‌م چێوه‌ی هه‌ماهه‌نگی-شدا ڕێگره لەبەردەم دروستکردنی حکومەت کە لایەكانی چێوە خۆیان به‌‌شێك بوون له دروستکردنی ئه‌و به‌ربه‌سته‌ی 220 ئه‌ندام په‌رله‌مانه.
باوەڕی خۆیشی نیشاندەدات بەوەی، بارودۆخی عێراق بۆ خراپتر هه‌نگاو ده‌نێت و سه‌دریش ئه‌وه‌ی ده‌یه‌وێت له‌وه گه‌وره‌تره کە ده‌بینرێت و ده‌بیسترێت، ئه‌و ده‌یه‌وێت به ئێران و ئه‌مریکا و به‌ریتانیا و ئه‌وروپا و سوننەكان بڵێت (من خاوه‌نی بڕیارم له عێراقدا و مه‌رجه‌عیه‌ت مافی سه‌ید موقته‌دا سه‌دره و شیعه‌ی عێراق جیاده‌بێته‌وه و لەژێر مه‌رجه‌عیه‌تی قوم ده‌رده‌چێت و شیعه‌ی عه‌ره‌ب نه‌جه‌فه و سه‌ید موقته‌دایه) ئه‌وه‌ش به (چرای سه‌وزی ئه‌مه‌ریکا و ڕێنمایی بەریتانیا و سه‌ردانی پاپای ڤاتیکان بۆ عێراق و پاره‌ی سعودیه) ئه‌و پرۆژه‌یه به‌رهه‌مهاتووه و به‌رده‌وامه.
سكرتێری پارتی سۆسیال دیموکرات دەشڵێت، کورد نابێت به ده‌ستکاریی ده‌ستوور ڕازی ببێت و خۆشی بگلێنێت بە کێشه‌یه‌که‌وه که کێشه‌ی ئه‌و نیه.
