خۆپیشاندەرانی لایەنگری سەدر چوونە ناو ئەنجومەنی نوێنەران دوای ئەوەی بەیانی ئەمڕۆ جارێكی دیكە خۆپیشاندانیان دەستپێكرد.
بەیانی ئەمڕۆ سەدان كەس لە لایەنگرانی ڕەوتی سەدر خۆپیشاندانیان لە بەغدادی پایتەخت دەستپێكرد.
هەموو هەوڵێكی خۆپیشاندەران لە ساتی یەكەمی خۆپیشاندانەكەوە بڕینی بەربەستە ئەمنی و كۆنكرێتییەكان و گەیشتن بوو بە ناوچەی سەوز.
نیوەڕۆی ئەمڕۆ بەشێك لە خۆپیشاندەران خۆیان گەیاندە ناو بینای ئەنجومەنی نوێنەرانی عێراق و هۆڵەكانی كۆبوونەوەی ئەنجومەنەكە، ئەمەش سەرەڕای بڵاوەپێكردنی ژمارەیەكی بەرچاوی هێزە ئەمنییەكان، لە هەندێك شوێنیش بەكارهێنانی بۆمبی فرمێسكڕێژ و ئاوی گەرم.
خۆپیشاندان كە لە كۆتایی هەفتەی ڕابردووەوە دەستیپێكردووە، كاندیدكردنی محەمەد شیاع سودانی بۆ پۆستی سەرۆك وەزیران لەلایەن هێزەكانی چێوەی هەماهەنگی-یەوە ڕەتدەكەنەوە.
دوابەدوای چوونی خۆپیشاندەران بۆ ناو ئەنجومەنی نوێنەران میدیای ڕەوتی سەدر ڕایگەیاند، ڕەوتەكەیان سوورە لەسەر دانانی ڕێوڕەسمی پرسە بۆ ئیمام حوسێن لەناو بینای ئەنجومەنی نوێنەران، بەبۆنەی هاتنی مانگی موحەڕەم-ەوە.
