لە هەولێر لیژنەیەك پێكهێنرا بۆ ڕووبەڕووبوونەوەی زیادەڕۆیی و سزادانی سەرپێچیكاران

وەزیری ناوخۆی حکومەتی هەرێم ڕایگەیاند،هەست دەکرێت زێدەڕۆییەکان ڕوو لەهەڵکشانە و ئەو پرسەش بووەتە مایەی نیگەرانی سەرۆکی حکومەتی هەرێمی کوردستان بۆیە بڕیاردرا لیژنەیەک پێکبهێنرێت بۆ ڕوبەڕووبوونەوەی زیادەڕۆیی و سزادانی سەرپێچیکاران.

ڕاگەیاندنی پارێزگاری هەولێر بڵاویكردەوە، ئەمڕۆ بەسەرپەرشتی ڕێبەر ئەحمەد، وەزیری ناوخۆ و ئومێد خۆشناو، پارێزگاری هەولێر و بەڕێوەبەرانی (پۆلیس، ئاسایش، زێرەڤانی، هاتوچۆ) و لیژنەی زیادەڕۆییەکان، لەدیوانی پارێزگا، کۆبوونەوەیەکە تایبەت بەپرسی زیادەڕۆییەکان لە سەر داواکاری وەزارەتی ناوخۆ ئەنجامدرا.

لە كۆبوونەوەكەدا ڕێبەر ئەحمەد ئاماژەی بەوەكردووە، “هەست دەکرێت زیادەڕۆییەکان بۆ سەر موڵکی گشتی ڕوو لە هەڵکشانە و ئەو پرسەش بووەتە مایەی نیگەرانی سەرۆکی حکومەتی هەرێمی کوردستان”.

ناوبراو پۆلێنکردنی جۆرەکانی زیادەڕۆیی بەمشێوەیە دیاریکردوە:

1- زیادەڕۆیی لەسەر موحەرەماتی شەقام، بەتایبەتی ڕێگاکانی دەرەوەی شار کە قوربانی زۆری لێکەوتۆتەوە.

2- زیادەڕۆیی لەسەر بۆڕی نەوت، بەتایبەتی لەناو ئەو باخانەی كە دەکەونە سەر ڕێگەی ئەو بۆڕییانە.

3- زیادەڕۆیی لە سەر ڕێڕەوی ئاو کە بووەتە هۆی دروستبوونی کارەسات.

هەر بەپێی ڕاگەیەندراوەكە، ڕێبەر ئەحمەد وتوویەتی، “نابێت بەرپرسانی ئیداریی خۆیان لەو بەرپرسیارێتییە ڕاستەقینە بەدووربگرن و سەرجەم دامودەزگاکانی حکومەت بەرپرسن لە ڕێگریکردن لەو زیادەڕۆییانەی لە سنووری ئیدارەی ئەوان دەکرێت”.

چارەسەرەکانی وەزارەتی ناوخۆ بۆ پرسی زیادەڕۆیی ئەمانەن:

1- لیژنەیەک لە هێزەکانی (ئاسایش، زێرەڤانی، پۆلیس) پێکبهێنرێت، هەر زیادەڕۆییەک لەسەر بۆری نەوت کرابێت کە شادەماری ئابوریی هەرێمی کوردستان لایەنی سەرپێچیکار ئاگاداربکرێتەوە و ئەو زیادەڕۆییانە لاببرێت.

2-هەمان لیژنە بەیاوەری پۆلیسی هاتوچۆ، چارەسەری هەموو ئەو زیادەڕۆییانە بکات کە کراوەتە سەر شەقامی دەوڵەت، بەتایبەتی ئەوانەی لە شەقامە سەرەکیەکان ئەنجامدراوە.

3- پیێویستە لەپارێزگای هەولێر تیمێکی تایبەت پێکبهێنرێت، بەهەماهەنگی لەگەڵ قائیمقام و بەڕێوەبەری ناحیەکان، هەر سەرپێچیەک هەبێت ڕاستەوخۆ بڕیاری چارەسەرکردنی بدرێت، ئەو کەس و لایەنەشی ڕێگەیداوە بە ئەنجامدانی زیادەڕۆییەکە ڕێکاری یاسایی لەبەرامبەردا بگیرێتەبەر.

4- زیادەڕۆیی لەسەر ڕێرەوی سەرەکی و فەرعیەکانی ئاو بەهیچ شێوەیەک ڕێگەپێدراونییە و بەهەموو شێوەیەک پێویستە چارەسەربکرێت، چونکە ئەمە هۆکارە بۆ دروستبوونی لافا و نانەوەی کارەسات.