دوای تۆپبارانەکەی دوێنێی تورکیا لە سنووری ئیدارەی زاخۆ، 91 ئەندامی ئەنجومەنی نوێنەرانی عێراق داوایەکیان ئاراستەی سەرۆکایەتیی کردووە بۆ کۆبوونەوەی بەپەلە و ئامادەبوونی مستەفا کازمی لەوبارەیەوە.
لە داواکاری ئەو 91 پەرلەمانتارەدا هاتووە، “ئێمە کە لە نووسراوەکەدا واژوومان کردووە و ناومان هاتووە، داوادەکەین بە پشتبەستن بە ماددەی 16)/7/ب)ی دەستوور و حوکمەکانی ماددەی (30/یەکەم) لە یاسای ئەنجومەنی نوێنەران، داوادەکەین دانیشتنێکی بەپەلە لەبارەی پێشێلکارییەکانی تورکیا و کردنە ئامانجی هاوڵاتییانی مەدەنیی وڵاتەکەمان ئەنجامبدرێت”.
پەرلەمانتارەکان داوادەکەن، سەرۆک وەزیرانی عێراق و فەرماندەی هێزە چەکدارەکانی عێراق لە کۆبوونەوەکەدا ئامادەبێت، هەروەها داوای ئامادەبوونی وەزیری بەرگریش دەکەن.
بەپێی داواکە، مەبەستی کۆبوونەوەکە گرتنەبەری ڕێکاری پێویستە بۆ ڕێگریکردن لە دووبارەبوونەوەی ئەو پێشێلکارییانە و ڕێزگرتن لە سەروەریی خاکی عێراق.
