بە مەبەستی پاراستنی چیاكانی گوێژە و ئەزمەڕ لەڕووداوەكانی ئاگركەوتنەوە بڕیاردرا ئاگركردنەوە و مانەوەی شەوانە لە هەردوو چیاكە قەدەغە بكرێن.
ئەمڕۆ چوارشەممە كۆبوونەوەی لیژنەی فریاگوزاریی خێرا بۆ ڕووبەڕووبوونەوەی ڕووداوە سروشتی و نەخوازراوەكان بەرێوەچوو و قائیمقامی سلێمانی جەختی لە ئامادەباشی دام و دەزگا و لایەنە پەیوەندیدارەكان كردەوە، بەمەبەستی پاراستنی چیاكانی گۆیژە و ئەزمەر لەمەترسی ئاگركەوتنەوە كەلەوەرزی گەرمادا مەترسیی ئاگركەوتنەوەیا لێدەكرێت.
لە كۆبوونەوەكەدا بڕیار درا ئاگركردنەوە لەچیای گۆیژەو ئەزمەر بەهەمەموو شێوەیەك قەدەغە بكرێن ناكرێت هاوڵاتی یاخود گەشتیار ئاگربكاتەوە و پاشماوەی ئاگرەكەی كارەساتی ئاگركەوتنەوەی لێبكەوێتەوە و ڕەنج و ماندوبوونی چەند ساڵە لەساتێكدا هەمووی بسووتێنێت، چونكە ئێستا چیای گۆیژە خۆشبەختانە زۆرینەی سەوزكراوە لەئایندەدا دەبێتە تابلۆیەكی نەخشێنراو بۆشاری سلێمانی، هەروەها بڕیاریشدرا مانەوەی شەوانەش لەچیاكەدا قەدەغەیە و ڕێگەپێدراو نییە بۆئەم مەبەستەش تیمی هاوبەش بەردەوام لەچیاكان ئامادەییان دەبێت و ڕێنمایی دەدەنە هاوڵاتییان و گەشتیاران لەئەگەری پابەندنەبووندا سەرپێچیكار ڕووبەڕووی سزای یاسایی دەبێتەوە.
