ئەنجومەنی نوێنەرانی عێراق بانگهێشتنامەیەکی ئاراستەی سەرۆكی فراكسیۆنەكان کردووە بۆ ئەنجامدانی کۆبوونەوەیەك، كە بڕیارە سبەینێ بەرێوەبچێت و مەبەستی کۆبوونەوەکەش دیاریکردنی ڕۆژێکە بۆ هەڵبژاردنی سەرۆک کۆماری نوێی عێراق.
لە ڕاگەیەندراوێکدا سەرۆکایەتیی ئەنجومەنی نوێنەرانی عێراق، داوا لە سەرجەم سەرۆكی كوتلە سیاسییەكان و فراکسیۆنەکان دەکات، سبەینێ دووشەممە کاتژمێر 11:00ی پێشنیوەڕۆ ئامادەی كۆبوونەوە بن.
مەبەستی دانیشتنەکەش دیاریکردنی ڕۆژێک دەبێت بۆ هەڵبژاردنی سەرۆک کۆماری نوێی عێراق لەناو ئەنجومەنی نوێنەراندا.
ئەو بانگهێشتنامەیەی ئەنجومەنی نوێنەرانی عێراق دوای ڕۆژێک دێت لە داوای چێوەی هەماهەنگی، بۆ ئەنجامدانی دانیشتنی ئەنجومەنی نوێنەران و یەکلاییکردنەوەی پۆستی سەرۆک کۆمار لەم هەفتەیەدا.
