سەرۆكی لیژنەی پیشەسازی و وزە لە ئەنجومەنی پارێزگای سلێمانی ڕایدەگەیەنێت، حكومەت وەك پێویست هەنگاوی بۆ دابەزاندنی نرخی بەنزین نەناوە، بۆیە نرخی بەنزین دانابەزێـت.
كەریم عەلی سەرۆكی لیژنەی پیشەسازی و وزە لە ئەنجومەنی پارێزگای سلێمانی لە لێدوانێكدا بە تۆڕی میدیایی ئێستای ڕایگەیاند، بڕیاری هەڵگرتنی باج و ڕسوومات لەسەر بەنزین و سووتەمەنی هیچ كاریگەرییەكی لەسەر دابەزاندنی نرخی بەنزین نەبووە و پێویستە ئێستا لەبری هەڵگرتنی باج لەسەر هاوردەكردنی سووتەمەنی دەبێت باج لەسەر هەناردەكردنی بەنزین دابنرێت و ئەو سووتەمەنییەی كە هەیە ناوخۆ سوودی لێوەربگرێت نەك هەناردەی دەرەوە بكرێت.
ڕاشیگەیاند، حكومەت وەكو پێویست چاودێریی نرخی بەنزین و سووتەمەنی ناكات و ئەوەش وایكردووە بازرگانەكان نرخی بەنزین هەرزان نەكەن و خۆیان نرخی بەنزین دیاریبكەن.
ئاشكرایكرد، “چەند جارێك بە نووسراو داوامان لە حكومەت و وەزارەتی سامانە سروشتییەكان كردووە ڕێوشوێنی پێویست بگرنەبەر، بەڵام هیچ ئەنجامێكی نەبووە”.
