ڕێکخراوی تەندروستیی جیهانی ئاشکرایکرد، دوای تێپەڕینی نزیکەی دوو ساڵ و نیو بەسەر ڕاگەیاندنی یەکەم حاڵەتی ڤایرۆسی کۆرۆنا، تا ئێستاش ڤایرۆسەکە دەتوانێت ببێتە مەترسیی جیهانی و هێشتا دۆخێکی کتوپڕی تەندروستییە لە جیهاندا.
لە ڕاگەیەندراوێکدا لیژنەی باری لەناکاوی ڕێکخراوی تەندروستیی جیهانی ڕایگەیاند، زیادبوونی حاڵەتەکانی تووشبوونی کۆرۆنا و گۆڕانە بەردەوامەکانی ڤایرۆسەکە و ئەو فشارەی لەسەر سیستمی تەندروستیی هەندێک لە وڵاتان دروستیکردووە مانای ئەوە دێت کە هێشتا لە دۆخی لەناکاوداین بەهۆی کۆرۆناوە.
ئاماژە بەوەکراوە، بەپێی ئەو حاڵەتانەی ڕێکخراوی تەندروستیی جیهانی تۆماریکردووە، لە ماوەی دوو هەفتەی ڕابردوودا ڕێژەی تووشبوون بە ڤایرۆسەکە 30% زیادیکردووە.
ڕێکخراوی تەندروستیی جیهانی بۆ یەکەمجار لە 30ی کانونی دووەمی 2020دا دۆخی لەناکاوی تەندروستیی جیهانیی ڕاگەیاند، بەهۆی بڵاوبوونەوەی ڤایرۆسی کۆرۆناوە.
