مەحما خەلیل، قائیمقامی شەنگال، ئەمڕۆ پێنجشەممە 26ی تشرینی دووەم ڕایگەیاند ئەو ڕێککەوتنەی لەنێوان هەرێمی کوردستان و حکومەتی عێراقدا کراوە سەبارەت بە شەنگال، شارۆچکەکە و خەڵکەکەشی دوای شەش ساڵ لە نەهامەتی ڕزگار دەکات.
لە ڕاگەیەنراوێکدا مەحما خەلیل بڵاویکردووەتەوە، لە ماوەی شەش ساڵی ڕابردوودا خەڵکی شەنگال ڕوبەڕووی زۆر کێشە و نەهامەتی بوونەتەوە، ڕوبەڕووی خراپترین و قورسترین تاوان بوونەوە لەلایەن چەکدارانی داعشەوە، خەڵکی شەنگال لەسەردەستی داعش تووشی ئاوارەبوون، ڕفاندن، کوشتن و گۆڕی بە کۆمەڵ بوون.
قائیمقامی شەنگال دەڵێت، “ئێستا خەڵکی شەنگال جگە لە گەڕانەوە بۆ ژیانی ئاسایی هیچ هیوایەکی دیکەیان نییە، ئەو هیوایەشییان بەستووەتەوە بە ڕێککەوتنی نێوان هەرێمی کوردستان و حکومەتی عێراق، تاوەکو ڕێگە بەهیچ کەس و لایەنێک نەدات لەدەرەوەی یاسا بڕیار لەسەر داهاتوویان بدات، دوای ئەوەی ئەزمونی شەش ساڵیان لەگەڵ ئەو هێزانە هەیە کە حکومیان بەسەرداکردوون و ترس و تۆقاندنیان بڵاوکردووەتەوە و ڕێگەیان لە گەڕانەوەیان گرتووە”.
مەحما خەلیل ئاماژەی بەوەشکردوە، کە ئەو ڕێککەوتنە بەبێ هەوڵێکی نیشتمانیی گشتی کەموکورتی دەبێت، بۆیە پێویستمان بە هاوکاری و پاڵپشتیکردنی ڕێکخراوە خێرخوازییەکان، دەسەڵاتەکانی حکومەتی ناوەند و هەرێمی کوردستان، کەسایەتییە کاریگەرەکانی وڵات هەیە کە بەشێوەیەکی جیدیی بڕواننە قەزیەی شەنگال و لانیکەم کەمترین مافەکانیان بۆ دابینبکرێت و هانبدرێن بۆ گەڕانەوەیان بۆ زێدی خۆیان.
قائیمقامی شەنگال باسلەوەدەکات، ئەم هەنگاوانە پێویستی بە کۆمەڵێک ڕێکاری پێویستە لە لایەنی ئەمنی، ئابوری، کۆمەڵایەتی، خزمەتگوزاری، کارگێڕی و مرۆییەوە، هەروەها پێویستی بە هەوڵە نێودەوڵەتییەکان هەیە بۆ تەواوکردنی ئەو هەوڵە ناوخۆییانە بۆ بونیادنانەوەی شارۆچکەکە و قەرەبووکردنەوەی ئاوارەکان و خەڵکی شەنگال لەڕووی مادی و مەعنەوییەوە.
دەشڵێت، خەڵکی شەنگال بە سەرجەم پێکهاتە نەتەوەیی و ئاینییەکانییەوە لە دۆخێکی قورسی مرۆیی، دەروونی و تەندروستییدان.
