بۆریس جۆنسن تا پاییز لە پۆستی سەرۆك وەزیرانی بەریتانیادا دەمێنێتەوە و سەرۆكایەتیی پارتەكەی لەدەستدەدات.
بۆریس جۆنسن سەرۆك وەزیرانی بەریتانیا، قایلبوو دەست لە هەردوو پۆستی سەرۆكایەتیكردنی پارتی پارێزگاران و سەرۆك وەزیرانی بكێشێتەوە.
شەپۆلی دەستلەكاركێشانەوەكان لە بەریتانیا بەردەوامە، ئەمڕۆ چوار پەرلەمانتاری تر وەك ناڕەزایەتییەك بەرامبەر بە وەرنەگرتنەوەی متمانە لە بۆریس جۆنسن، دەستیان لەكاركێشایەوە. ئێستا سەرۆك وەزیرانی بەریتانیا پشتیوانیی پەرلەمانتار و وەزیرەكانی خوودی پارتەكەی خۆیشی لەدەستداوە و ناچارە دەستلەكاربكێشێتەوە. بەشێك لە پەرلەمانتار و وەزیرەكانی لەوانە نەدیم زەهاوی، پێشنیازیان بۆ جۆنسن كردووە دەستلەكاربكێشێتەوە و “بە شكۆمەندییەوە” پۆستەكەی بەجێبهێڵێت.
بەپێی بی بی سی، ئەمڕۆ بۆریس جۆنسن پۆستی سەرۆكایەتیكردنی پارتی پارێزگارانی لەدەستدا و قایلبووە دەست لە پۆستەكە بكێشێتەوە، بەڵام تا هەڵبژاردنی سەرۆكێكی نوێ لە پۆستەكەیدا وەك سەرۆكی پارتی پارێزگاران دەمێنێتەوە. بە دوای ئەوەشدا جۆنسن دەست لە پۆستی سەرۆك وەزیران هەڵدەگرێت و لە مانگی تشرینی یەكەمی ئەمساڵ و لە كۆنگرەی پارتەكەیدا، كەسێكی تر بۆ پۆستی سەرۆك وەزیرانی بەریتانیا دەستنیشاندەكرێت و جێگەی جۆنسن دەگرێتەوە.
بۆریس جۆنسن سەرۆكی پارتی پارێزگارانی بەریتانیا، هاوینی ساڵی 2019 كاتێك پارتەكەی هەڵبژاردنی بردەوە، بوو بە سەرۆك وەزیران و بڕیاربوو لایەنی كەم تا ساڵی 2024 كە وادەی بەڕێوەچوونی هەڵبژاردنی داهاتووە، لە پۆستەكەیدا بمێنێتەوە.
