وەزارەتی خوێندنی باڵا بڕیاریدا لێخۆشبوون لە ڕسومانی پشتگیریی دەرچوون بۆ بەشەكانی كشتوكاڵی و ڤێترنەریی زانكۆكان دەربكات.
وەزارەتی خوێندنی باڵا و توێژینەوەی زانستیی هەرێم بڵاویكردەوە، بە فەرمانى وەزارى ژمارە (992) لە ڕێکەوتى (2022/7/4) بڕیاردرا بە لێخۆشبوون لە وەرگرتنى ڕسوماتى پشتگیریى بڕوانامەى دەرچوون، بۆ دەرچووانى بەشە کشتوکاڵییەکان و ڤێترنەرى لە زانکۆکانى هەرێمى کوردستان کە دانەمەزراون.
لێخۆشبوونەكە بەمەبەستى پاڵپشتیی پڕۆژەی سەرپەرشتیکردنى پڕۆژە کشتوکاڵییەکانە لە کەرتى تایبەت کە لەلایەن وەزارەتى کشتوکاڵ و سەرچاوەکانى ئاو داواى هەلى کار و دامەزراندنیان كراوە.
بڕیارەکە ئاراستەى گشت زانکۆ حکومییەکانى هەرێمى کوردستان کراوە بەمەبەستى جێبەجێکردنی.
لای خۆیەوە بێگەرد تاڵەبانی وەزیری كشتوكاڵ و سەرچاوەكانی ئاو سەرەڕای هەڵسەنگاندن و پێزانینی بۆ بڕیارەكە دەڵێت، بریارێکی زۆر دڵخۆشکەرە بۆ دەرچووان و، دەبێته بنەمای خێرابوونی پرۆسەکە و کەمکردنەوەی ڕۆتین و گەڕاندنەوەی تێچووی ڕسوماتی وەرگرتنی پشتگیری لە میانی تۆمارکردن و گەڕاندنەوەی فۆرمەکان و دڵنیاییدانی زیاتر لە سەرکەوتنی پڕۆژەی نیشتمانیی دامەزراندنی دەرچووانی بەشەکانی کشتوکاڵی و ڤێتێرنەری لە چێوەی پڕۆژی سەرپەرشتیارانی پڕۆژە کشتوکاڵییەکان لە کەرتی تایبەتی هەرێمی کوردستان.
