عێراقییەكان ڕوویان لە خواردنی گۆشتی ئاسك كردووە و هۆشداری لە مەترسیداریی دیاردەكە دەدرێت.
بەپێی ئامارەكان، ڕاوكردنی ئاسك لە عێراق زیادیكردووە و چالاكوانێكی ژینگە دەڵێت، حەزی بەشێك لە هاوڵاتییان بۆ خواردنی گۆشتی ئاسك، هەڕەشەی لەناوچوون لە دەگمەنترین جۆرەكانی ئاسك لە عێراق دەكات.
ئیبراهیم زەیدی چالاكوانی ژینگە ڕایگەیاند، 70%ی ئاسكەكانی جۆری ڕیم لە پارێزگای دیالە و ناوچەكانی خۆرهەڵاتی عێراقن، بەڵام بەهۆی ڕاوكردنەوە 90%یان لەناوچوون.
ئەو چالاكوانە ئاشكرایكرد، لە ماوەی كەمتر لە دوو ساڵدا، نرخی ئاسك بۆ سێ هێندە بەرزبووەتەوە، چونكە تەنها بۆ خواردنی گۆشتەكانیان بەكارناهێنرێن، بەڵكو بە زیندوویی لە باخەكاندا بەخێودەكرێن و ئەوەش هۆكارێكی تری هەڵكشانی دیاردەی ڕاوكردنی ئاسكە.
بەپێی وتەی زەیدی، هیچ چاودێرییەك لەسەر ڕاوكردنی ئاسك نییە و بە شێوەیەكی هەڕەمەكی ڕاودەكرێن، بۆیە ژمارەیان كەمبووەتەوە بۆ كەمترینی پەنجا ساڵی ڕابردوو و مەترسیی لەناوچوونیان لەسەرە.
