وەزارەتی کشتوکاڵ و سەرچاوەکانی وردەکاریی دامەزراندنی پێنج هەزار دەرچووی بڵاوکردەوە كە لەسەر ئاستی پارێزگاکان و ئیدارە سەربەخۆکان لیژنەی باڵای وەزاری پێکهاتوو دەست بەکاردەبێت.
وەزارەتەكە لە ڕاگەیەندراوێكدا دەڵێت، پاڵپشت بە یاسای ژمارە (20 )ی ساڵی2021 ی سەرپەرشتیارانی پڕۆژەکانی کشتوکاڵی لە کەرتی تایبەت، وە ئاماژە بەڕێنمایی ژمارە(4) ی تایبەت بە جێبەجێکردنی ئەم یاسا و ڕێنمایی و ڕێکارانە ، لەسەر ئاستی پارێزگاکان و ئیدارە سەربەخۆکان لیژنەی باڵای وەزاری پێکهاتوو دەستبەکاردەبێت، بەمەبەسی پاڵاوتن و وەرگرتن و زانیاریی کەسی لەدەرچووانی دانەمەزراو لەبەشەکانی کشتوکاڵی و فێتێرنەری کە خواستی کارکردن و سەرپەرشتیاریان هەیە بەپێی (بڕوانامە ، پسپۆری ، ساڵی دەرچوو ، ئەزموون ).
ڕوونیشیكردووەتەوە، “ئەم پرۆسەیە لە ڕۆژی 2022/7/3 دەستپێدەکات تاوەکو ماوەی 2022/8/1 بەردەوام دەبێت، لەهەمانکاتدا سەرجەم فەرمانگە پەیوەندیدارەکانی وەزارەت هەماهەنگی ئامادەکاریی دەکەن بۆ دانانی بەرنامەی خولی شیاندن و ڕاهێنان بەشێوەی تیۆری و پراکتیکی و ئامادەکردنی گرێبەستی کارکردن و جێگیرکردنی ئەرک و مافەکانی سەرپەرشتیاران بەپێی ئەو میکانیزمانەی کە دانراوە هەنگاو بەهەنگاو لە چێوەی یاساکە و ڕێنمایی ئامادەکراو.
ڕوونیشیكردووەتەوە، دەرچووی بەشەکانی کشتوکاڵی و فێتێرنەری بەپێی شوێنی جوگرافی و نیشتەجێبونی خۆیان دەتوانن سەردانی بەڕێوەبەرایەتی گشتیی کشتوکاڵی پارێزگاکان و ئیدارە سەربەخۆکان بکەن، بۆ پێدانی زانیاری لەلایەن ئەو لیژنەیەی کە سەرپەرشتی تۆمارکردنی ناوەکان دەکات.
هەر لە ڕاگەیەندراوەكەدا هاتووە، “ئەم فۆرمەی پردەکرێتەوە، بەخۆرایی دابەشدەکرێت لەسەر ئاستی فەرمانگە کشتوکاڵیەکانی هەرێمی کوردستاندا”.
