یەكێـتیی مامۆستایانی كوردستان لەسەر شەهیدكردنی دوو مامۆستاكەی زانكۆی سەڵاحەدین هاتە دەنگ و داواش لە حكومەتی هەرێم دەكات بە هەموو شێوەیەك هەڵگرتنی چەك قەدەغە بكات.
مەكتەبی سكرتاریەتی یەكێتیی مامۆستایان ڕاگەیەندراوێكی بڵاویكردووەتەوە و تێیدا هاتووە، ئەمڕۆ ڕۆژێكی ڕەش بوو بۆ شاری هەولێر و هەرێمی كوردستان و یەكێتیی مامۆستایان باوەڕی تەواوی بەوە هەیە كە شەهیدكردنی مامۆستایان لە گۆڕنانی پەروەردە و خوێندنی باڵایە، دواجاریش هەڵتەكاندنی كۆمەڵگەشە.
لە ڕاگەیەندراوەكەدا هاتووە، یەكێتیی مامۆستایان لە سۆنگەی هەستكردن بە مەترسییەكان كە ڕووبەڕووی مامۆستایان دەبنەوە و پێشووتر پڕۆژەیاسایەك بۆ دانانی پارێزبەندی بۆ مامۆستایان پێشكەشی پەرلەمانی كوردستان كرابوو و لەئێستاشدا داوادەكەین پەرلەمانی كوردستان چاو بە بڕیاری ڕەتكردنەوەی پڕۆژەیاسای پارێزبەندی بۆ مامۆستایان بخشێنێتەوە.
ئاماژە بەوەشكراوە، كە یەكێتیی مامۆستایانی كوردستان داوا حكومەتی هەرێم دەكات بە هەموو شێوەیەك هەڵگرتنی چەك قەدەغە بكات و ڕووداوەكانی كوشتن و برینداركردن بە چەك بوونەتە دیاردە.
