وەزارەتی خوێندنی باڵا و توێژینەوەی زانستیی هەرێمی كوردستان، ڕاگەیەندراوێکی لەبارەی كوژرانی دوو مامۆستای زانكۆی سەڵاحەدین بڵاوكردەوە و داوادەكات ئەو جۆرە ڕووداوانە لەناو كۆمەڵگەی زانكۆیی پەرەنەستێنن.
لە ڕاگەیەندراوەكەیدا وەزارەتی خوێندنی باڵا و توێژینەوەی زانستی دەڵێت، “بەداخ و نیگەرانییەکەی زۆرەوە سەرلەبەیانیی ئەمڕۆ سێشەممە لە ڕووداوێکی نەخوازراو و چاوەڕواننەکراودا، لە کۆلێژی یاسای زانکۆی سەڵاحەدین – هەولێر، یەکێک لە قوتابییەکانی بەشی یاسا بە چەک هێرشدەکاتەسەر حەرەمی زانکۆ و لە ئەنجامدا (د. کاوان ئیسماعیل) ڕاگری کۆلێژی یاسای زانکۆی سەڵاحەدین و (د. ئیدریس حەمەخان) مامۆستای کۆلێژی ئەندازیاریی زانکۆی سەڵاحەدین شەهید دەبن و یەکێک لە کارمەندەکانیش برینداردەکات”.
وەزارەتەکە جەختدەكاتەوە “لەپێناو سەروەریی یاسا و پاراستنی حەرەمی زانکۆکان، هەموو ڕێکارێکی یاسایی دەگرینەبەر، هیواشمانوایە هەموو مامۆستایان و خوێندکاران و کۆمیونیتیی ئەکادیمی زانکۆکان پێکەوە هەماهەنگبن بۆ ئەوەی بەرپرس بین و نەهێڵین ئەم دیارەدە دزێوانە بپەڕنەوە ناو حەرەمی زانکۆکانمان و پەرەبستێنن”.
