بانكی ناوەندیی عێراق ڕایدەگەیەنێت، عێراق 10 پلەی چووەتە پێشەوە لە خشتەی ئەو وڵاتانەی خاوەن زۆرترین یەدەگی زێڕن و بووە خاوەن 130.39 تۆن زێڕ.
بانكەكە ئەمڕۆ لە ڕاگەیەندراوێكدا كڕینی بڕێكی نوێی زێڕی ئاشكراكرد كە نزیكەی 34 تۆن و زیادبوونە بە بڕی 35%ی ئەوەی پێشتر خاوەنی بووە.
لە ڕاگەیەندراوەكەدا هاتووە، زیادكردنەكە لە چێوەی ستراتیژی بانكی ناوەندیدایە بۆ بەڕێوەبردنی سەروەت و سامانەکانی بە مەبەستی بەدەستهێنانی بەرزترین ئاستی سەقامگیری و توانای ڕووبەڕووبوونەوەی گۆڕانکارییە ئابوورییە ناوخۆیی و نێودەوڵەتییەکان.
بەو كڕینە نوێیە عێراق چووەتە ڕیزبەندی 30هەمین لەسەر ئاستی جیهان و چوارەم لەسەر ئاستی وڵاتانی عەرەبی.
زێڕ یەکێکە لە گرنگترین سەروەت و سامانەکانی بانکە ناوەندییەکان و دامەزراوە داراییە نێودەوڵەتییەکان، هەروەها پەناگەیەکی سەلامەتە لە بارودۆخی نادڵنیاییدا، بەهۆی قبوڵکردنی لەسەر ئاستی نێودەوڵەتی.
زیادبوونی یەدەگی زێڕ کاریگەریی دەبێ لەسەر متمانە و بەھێزبوونی نرخی کڕینی دیناری عێراقی و جێگیربوونی دۆخی دارایی وڵات.
