گوندی “عەراقیب” كە دەكەوێتە ناوچەی “نەقب” لە باشووری فەڵەستین، ئەمڕۆ دووشەممە بۆ جاری 203ـیەمین لەلایەن دەسەڵاتدارانی ئیسرائیلەوە خاپووركرا.
22 خێزان لە گوندی “عەراقیب” دەژین و خانووەكانیان لە دار و تەختە و پلاستیك و چادر دروستكردووە، بەشێكیشیان خێمەیان هەڵداوە، بەڵام ناوبەناو حكومەتی ئیسرائیل خێوەت و خانووەكانیان دەڕووخێنێت.
عەزیز تەوڕی ئەندامی لیژنەی بەرگریكردن لە گوندەكە ڕایگەیاند، 203ـیەمین جارە ئیسرائیلییەكان گوندەكەیان خاپووردەكەن، بەڵام دانیشتووانەكەی ئەم جارەش بنیادی دەنێنەوە.
عەراقیب بەشێكە لەو زەوییانەی بە 48 ناسراون، ساڵی 1948 لە كاتی دامەزراندنی دەوڵەتی ئیسرائیل-دا ناوچەكە كەوتووەتە سنووری ئەو وڵاتەوە و فەڵەستینییەكان بە خاكی خۆیانی دەزانن.
لە هەفتاكانی سەدەی ڕابردوودا ئیسرائیل 1250 دۆنم زەویی داوەتەوە بە فەڵەستینییەكان، بەڵام ساڵی 2000 زنجیرەی خاپووركردنی گوندەكە دەستیپێكردووە و دانیشتووانەكەی دەڵێن، “لەو كاتەوە تا ئێستا 203 جار خاپووركراوە”.
