سەرۆك كۆماری عێراق لەبارەی هێرشە مووشەكییەكانی سەر كێڵگەی غازیی كۆرمۆر هاتەدەنگ و دەڵێت، زیان بە ئابوریی نیشتمانی دەگەیەنێت.
د.بەرهەم ساڵح، سەرۆك كۆماری عێراق لە تویتێكدا كە لە هەژماری تایبەتیی خۆی لە تۆڕی كۆمەڵایەتی تویتەر بڵاویكردووەتەوە نووسیویەتی، “دەستدرێژییەكانی سەر کێڵگەی غازیی كۆرمۆر و كێڵگەكانی ناوچەکانی دیکە، سەقامگیریی وڵات دەكەنە ئامانج و زیان بە ئابوریی نیشتمانی دەگەیەنێت”.
دەشڵێت، “هیچ بژاردەیەکمان نییە جگە لەوەی بە توندی لە دژی ئەم هەوڵە تاوانکارییە دڕندانە بوەستین و پێویستە پشتیوانیی هێزەئەمنییەكان بكەین و هەموو هێزە نیشتمانییەکانیش یەکبگرن بۆ پتەوكردنی بنەماكانی دەوڵەت”.
ئەوەش لەكاتێدایە، لەماوەی سێ ڕۆژی ڕابردوو پێنج مووشەك ئاراستەی كێڵگەی غازیی كۆرمۆر كراوە.
