پارێزگارێكی پێشوو دوو سزای زیندانیكردنی بەسەردا دەسەپێندرێت

دادگای ناوەندیی تاوانەكانی گەندەڵی كە تایبەتە بە بەگژداچوونەوەی گەندەڵی و سەر بە دادگای فیدراڵیی كەرخە لە بەغداد، ئەمڕۆ سێشەممە 16ی شوبات، دوو بڕیاری بەسەر پارێزگاری پێشووی نەینەوادا سەپاند.

نەوفەل حومادی، دوای ڕزگاركردنی نەینەوا لە داعش، كرا بە پارێزگار و تۆمەتباركراوە بە تێوەگلان لە گەندەڵی.

ناوەندی ڕاگەیاندنی ئەنجومەنی باڵای دادوەری لەبارەی دوو بڕیارەكەی دادگاوە دەڵێت، “حومادی تاوانبارە بە ئەنجامدانی پرۆژەی وەهمی و ساختە لە پاككردنەوە و ئاوەدانكردنەوەی نەینەوادا.”

ڕوونیشیكردەوە، “ئەو پرۆژانە لە ماوەی نێوان ساڵانی 2017 بۆ 2019 بڕیاریان لێدراوە، بەڵام ساختەبوون و بەبێ جێبەجێكردن ماونەتەوە و پارەكانیان خوراون.”

دوو بڕیارەكەی دادگا لەدژی نەوفەل حومادی، یەكێكیان بریتییە لە زیندانیكردنی توندی ناوبراو بۆ ماوەی سێ ساڵ، دووەمیشیان زیندانیكردنی توندە بۆ ماوەی دوو ساڵ.

دادگای ناوەندیی تاوانەكانی گەندەڵی، مافی داوە بە پارێزگای نەینەوا سكاڵا لەسەر پارێزگاری پێشوو تۆماربكات و داوای قەرەبووی دارایی لێبكات بەپێی مادەی 340 لە یاسای سزادانی عێراقی.

بابەتی پێشتر

خورماتوو.. شانەی قەیرانەكان چەندین بڕیاری بۆ هاوڵاتییان دەركرد

بابەتی دواتر

چاوپێكەوتنەكەی ڕەغد سەدام حسێن.. پەیام بوو یان ڕۆڵ؟

بابەتی پەیوەندیدار
Total
1
Share