پارێزگای هەولێر ڕەتیدەكاتەوە مافی خاوەندارێتی لە خاوەن مۆلیدەیەكی گەڕەكی خانەقا زەوتكرابێت و مۆلیدەكەی لێداگیركرابێت و جەختدەكاتەوە، ئەو كەسە پێشتر چەندین سكاڵای یاسایی لەسەر تۆماركراوە و كەسێكی سەرەڕۆ و یاساشكێنە، لای ئێمەش 400 ماڵە هەژاری گەڕەكێك لەكەسێكی سەرەڕۆ و یاساشكێن گرنگترە.
بەپێی ڕاگەیەندراوێكی پارێزگای هەولێر تێیدا هاتووە، “دوای ئەوەی كەسێك گوایە مۆلیدەكەی لە گەڕەكی خانەقا كە گەڕەكێكی هەژارنشینی شاری هەولێرە لێی داگیركراوە و مافی خاوەندارێتی پێشێلكراوە، ئەو قسەی كە كەسە باسی لێوەدەكات بڕو بوختانە و دوورە لەڕاستییەوە.
ئاماژە بەوەشكراوە، ئەو كەسە پێشتر كارپێكەری مولیدەی ئەو گەڕەكە بووە، چەندینجار بەهۆی سەرپێچی و نەدانی كارەبا و بڕینی كارەبا لەسەر هاوڵاتییان و دروستكردنی گرفتی زۆر بۆیان، لەلایەن هاوڵاتییانی ئەو گەڕەكە سەدان سكاڵای لەسەر تۆماركراوە و لەلایەن لیژنە و ئەنجومەنی مۆلیدە ئەهلیەكانی شاری هەولێر و قائیمقامیەتی ناوەند چەندینجار ئاگاداركراوەتەوە و ڕێوشوێنی یاسایی بەرامبەر گیراوەتەبەر و بەڵێنامەی لێوەرگیراوە كە جارێكی دیكە دووبارەیان نەكاتەوە، بەڵام سوودی نەبوە و نەك دووبارە و بگرە چەندان بارەی كردووەتەوە و بەهیچ شێوەیەك پابەندی بڕیار و ڕێنماییەكان و دەستەبەركردنی مافی هاووڵاتیان نەبووە.
لە ڕاگەیەندراوەكەدا هاتووە، ” ئەو كەسە جگە لەوەی خۆی كەسێكی سەرەڕۆ و یاساشكێنە، چەندینجاری دیكە لەلایەن دادگاوە بەبڕیاری دادوەر و بە تۆمەتی دیكە دەستگیركراوە، هەربۆیە لە ئێستادا مۆلیدەكەی گەڕەكی خانەقا لەلایەن لیژنە و ئەنجومەنی مۆلیدە ئەهلییەكانی شاری هەولێر بەڕێوەدەبرێت”.
پارێزگای هەولێر جەختدەكاتەوە، “لەلای ئێمە 400 ماڵە هەژاری گەڕەكێك لەكەسێكی سەرەڕۆ و یاساشكێن گرنگترن كە هەمیشە مایەی سەرئێشە و نانەوەی گرفت بووە بۆ هاوڵاتییانی ئەم گەڕەكە و لیژنە و ئەنجومەنی مۆلیدە ئەهلییەكانی شاری هەولێر.
