فڕۆكەیەك كە لە ئیستانبوڵەوە بەرەو تاران گەشتیدەكرد، لەلایەن توركیاوە ڕێگەی پێنەدرا بەنزین هەڵبگرێت، بۆیە لەگەڵ گەیشتنی بە خاكی ئێران ناچارانە نیشتەوە.
فڕۆكە ئێرانییەكە سەر بە كۆمپانیای “میعراج” بووە و گەشتەكەی ئەمڕۆ شەممە ئەنجامداوە، بەهۆی كەمیی سووتەمەنییەوە لەگەڵ گەیشتنی بە تەبریز لە باكووری خۆرئاوای ئێران ناچارانە نیشتووەتەوە.
پرسیار لە وەزارەتی گواستنەوەی توركیا كراوە بۆچی ڕێگەینەداوە فڕۆكەكە بەنزین تێبكات؟ لە وەڵامدا ڕایگەیاندووە، تیمی فڕۆكەكە مۆڵەتی وەرنەگرتووە و “ئەگەر كۆمپانیاكان ملكەچی ئەركی یاسایی نەبن، دووچاری گرفتی لەو جۆرە دەبن”.
وەڵامە فەرمییەكەی توركیا بەو شێوەیە بووە، بەڵام نازانرێت ئەوە هۆكاری سەرەكیی بابەتەكە بووە یاخود پەیوەندیی بە سزاكانی سەر ئێرانەوە هەیە، چونكە پێشتر چەندین جار كۆمپانیاكانی توركیا ڕێگەیان بە فڕۆكەی ئێرانی نەداوە سووتەمەنی هەڵبگرن.
