ئەنجومەنی خۆبەڕێوەبەریی دیموکراتیی شەنگال دەڵێت، هێرشە ئاسمانییەکەی دوێنێی تورکیا لە شەنگال بە هاوکاریی پارتی دیموكراتی كوردستان ئەنجامدراوە و میت و پاراستن پیلانەكەیان داڕشتووە.
ئەنجومەنی خۆبەڕێوەبەریی دیموکراتیی شەنگال ڕایگەیاند، هێرشە ئاسمانییەکەی دوێنێی تورکیا لە شەنگال بە هاوکاریی پارتی دیموكراتی كوردستان ئەنجامدراوە و دەڵێت، “پێشتر چەند کەسێکی سەر بە پارتی لە هەولێر لەگەڵ میت و پاراستن کۆبوونەتەوە و پیلانی ئاژاوەگێڕیی نوێیان لە شەنگال داڕشتووە”.
لە ڕاگەیەندراوێكدا كە لەبارەی هێرشە ئاسمانییەکەی دوێنێی تورکیا لە شارەدێی سنونێی شەنگال بڵاویکردەوە، ئەنجومەنی خۆبەڕێوەبەریی دیموکراتیی شەنگال ئەمڕۆ پێنجشەممە ڕایگەیاند، “لەو هێرشەدا منداڵێک شەهیدبووە و حەوت کەسی دیکەش برینداربوون و برینی هەندێکیشیان سەختە، پارتی سیناریۆی بۆ ئەو بۆردومانە و ڕووداوەکانی دوای بۆردومانەکەش ئامادەکردووە و تا ئێستاش سیناریۆکان بەردەوامن”.
ئەنجومەنەكە دەڵێت، “کەسانی نزیک لە پارتی لە هەولێر کە خۆیان خەڵکی شەنگالن، کۆبوونەوەیان لەگەڵ میت و پاراستنی پارتی ئەنجامداوە و گفتوگۆیان لەسەر دروستکردنی ئاژاوەگێڕیی کردووە لە شەنگال”.
