سەرۆكایەتی دادگای تێهەڵچوونەوەی سلێمانی نیگەرانی لە ڕووداوەكەی ئەمڕۆی ناو دادگا نیشاندەدات و ڕوونیشیدەكاتەوە، دۆسیەی كوشتنی تارقی بەقاڵ كۆتایی هاتووە و بكوژەكانی حوكمدراون بە لەسێدارەدان و سزاكەشیان لەلایەن دادگاوە پەسەندكراوە.
سەرۆكایەتیی دادگای تێهەڵچوونەوەی ناوچەی سلێمانی ڕوونكردنەوەیەكی بڵاوكردەوە و ڕایگەیاند، جێگەی داخ و نیگەرانییە دوای ئەوەی ئەمڕۆ لەناو دادگای سلێمانی حاڵەتێكی نەخوازراو ڕوویدا و گرتە ڤیدیۆیەكی كورت لە دەزگاكانی ڕاگەیاندن و تۆڕە كۆمەڵایەتییەكان بڵاوكراوەتەوە كە چەندین تۆمەت و چەواشەكاری و ناڕاستی تێوەئاڵێنراوە.
دەشڵێت، بۆ هەموو لایەكی ڕووندەكەینەوە كە دۆسیەی كوشتنی تاریقی بەقاڵ لە دادگا كۆتایی هاتووە و بكوژەكانی حوكمدراون بەلەسێدارەدان و سزاكەشیان لەلایەن دادگای پێداچوونەوەی هەرێمی كوردستان پەسەندكراوە و دۆسیەكەیان ڕەوانەی سەرۆكایەتیی هەرێمی كوردستان كراوە و، جێبەجێكردنی سزاكە پەیوەندی بە دادگاوە نییە و لە تایبەتمەندیی دەسەڵاتی جێبەجێكردنە.
”ئەو دانیشتنەی ئەمڕۆی دادگا پەیوەندی بە بكوژەكانەوە نەبووە، بەڵكو دادگایی كەسێك كراوە كە دوای دزینی، ئۆتۆمبیلەكەی تاوانلێكراوی كڕیوەتەوە و بەتۆمەتی (حیازة اموال مسروقة) دادگایی دەكرێت و دادگاییش لەو دۆسیەیە بەردەوامە” وەك ئەوەی لە بەشێكی دیكەی ڕوونكردنەوەدا هاتووە.
ڕوونیشیدەكاتەوە، هەر ئەمڕۆ دادگایی چەندین تاوانكار و تۆمەتبار لە دادگاكانی سلێمانی بەڕێوەچووە كە زۆر لە كەیسەكەی ئەو قورستر و ترسناكتە بوون و، كەسوكاری تاوانلێكراوان بەوپەڕی ڕێز و شكۆوە لە دادگا و دادوەر و دەسەڵاتی دادوەرییان ڕوانیوە و پرۆسەكە بەشێوەیەكی یاسایی ڕێكوپێك بەڕێوەچووە. بەپێچەوانەی كەسوكاری تاوانلێكراوی ناوبراو كە هەمیشە و لە هەموو دانیشتنێكی دادگادا پشێوییان ناوەتەوە و سوكایەتی و تەشهیر و بێڕێزی زۆریان بە دادوەران و داواكاری گشتی و پۆلیس و هەموو لایەك كردووە، بەڵام ڕەچاوی دڵگەرمییان و حاڵەتەكەیان كراوە و چاوپۆشییان لێكراوە، ئەمڕۆش سەرەڕای ئەوەی وەك هەموو جارێك سوكایەتی و جنێو و تەشهیریان بە دادوەران و داواكاری گشتی و پۆلیس و پاسەوانەكان كردووە و پەلاماریان داون، بەو کەرەستانەش لە بەردەستیان بووە ئازاری پۆلیس و پاسەوان و تەنانەت پارێزەریشیان داوە كە بەڤیدیۆ كۆی ڕووداوەكان بەردەستە و حاڵەتەكەی ئەمڕۆش كاردانەوەی ئەو ڕەفتارانەی ئەوان بووە.
سەبارەت بە دەستگیردنیشیان دەڵێت، لەسەر سكاڵای پۆلیسەكان و بەپێی مادەی (230)ی یاسای سزادان هەواڵەی دادگای لێكۆڵینەوە كراون و پاشان بە كەفالەت ئازادكراون تا ڕۆژی دادگایی.
سەبارەت بەو حاڵەتی لێدانەش كە لە گرتە ڤیدیۆكەدا دەركەوتووە دادگای سلێمانی دەڵێت، ڕەفتارێكی کەسییە و ئەو كەسە خۆی بەرپرسیارێتی هەڵدەگرێت و سەرۆكایەتیی دادگای تێهەڵچونەوەی ناوچەی سلێمانی پەسەندی ناكات و بە نەخوازراوی دەزانێت و، ئەو كەسەی ئازاردراوە دەتوانێت سكاڵا تۆماربكات و دادگا ئیجرائاتی یاسایی پێویست دەگرێتەبەر، بەڵام ناكرێت حاڵەتەكە بگشتێنرێت بەسەر هەموو پۆلیس و پاسەوانەكانی دادگادا كە ئەركیان پاراستنی هێمنی و ئاسایشی هاوڵاتییان و شكۆی دادگایە.
