مەسعود بارزانی بە تویتێكی كورت هەڵوێستی خۆی بەرامبەر بە بڕیارەكەی موقتەدا سەدر بۆ دەستلەكاركێشانەوەی پەرلەمانتارەكانی ڕاگەیاند، دەڵێت، “چاوەڕێی بەرەوپێشچوونەکانین”.
دوێنێ پەرلەمانتارانی ڕەوتی سەدر، فەرمانێكی ڕێبەری ڕەوتەكەیان جێبەجێكرد و دەستلەكاركێشانەوەیان پێشكەشی ئەنجومەنی نوێنەران كرد، محەمەد حەلبووسی-ش واژووی لەسەر كردن.
ئەمڕۆ مەسعود بارزانی سەرۆكی پارتی دیموكراتی كوردستان تویتێكی كورتی لەسەر هەڵوێستەكەی سەدر و ڕەوتەكەی كردووە، نوسیویەتی، “ڕێز لە بڕیارەکەی سەماحەتی بەڕێز موقتەدا سەدر دەگرین و چاودێریی بەرەوپێشچوونەکانی داهاتوو دەکەین”.
دەستلەكاركێشانەوەی پەرلەمانتارەكانی سەدر چاوەڕوانكراو بوو، بەو پێیەی کۆتایی هەفتەی ڕابردوو، موقتەدا سەدر لە گوتارێکدا داواى لە پەرلەمانتارانى ڕەوتەکەى کرد نامەى دەستلەکارکێشانەوە لە ئەنجومەنی نوێنەران بنووسن و واژووی بکەن.
دوێنێ دەستلەكاركێشانەوەكان لە حەنانەوە بران بۆ ئەنجومەنی نوێنەران و حەلبووسی واژووی لەسەر كردن.
