ئاژانسی مێترۆگرافی لە سلێمانی یەکەمین ڕێوڕەسمی خەڵاتی ساڵانەی كامەران نەجم بە مەبەستی دەستگیرۆیی فۆتۆگرافەران و ڕەخساندنی زەمینەی پێشبڕکێی بۆ کاری فۆتۆگرافی و دەرخستنی توانا شاراوەکان ڕێکدەخات.
سەرتیپ عوسمان، فۆتۆگرافەر لە مێترۆگرافی بە تۆڕی میدیایی ئێستای ڕاگەیاند، بە مەبەستی دەستگیرۆیی فۆتۆگرافەران و ڕەخساندنی زەمینەی پێشبڕکێی بۆ کاری فۆتۆگرافی و دەرخستنی توانا شاراوەکان زیاتر لە ساڵێکە لە ئامادەکاریداین و بانگەواز بۆ فۆتۆگرافەر، ڤیدیۆگرافەر، ڕۆژنامەنووسان کرا تا لە ھەرشوێنێکی ئەم جیھانەن بە بەرھەمەکانیان بەشداریی خەڵاتی کامەران بکەن و بابەتەکانیان پێشکەش بکەن کە لەسەر دووئاستی گشتگیر کارەکان رێکخراون و خەڵات دەبەخشرێت .
ڕوونیشیكردەوە، یەکەمیان بریتییە لە خەڵاتی ڕۆژنامەوانیی کامەران کە بڕی 12 ھەزار دۆلار دەبەخشرێتە ڕۆژنامەنووسێکی براوە کە لە یەکێک لە بوارەکاندا وەک پڕۆژەی درێژمەودا کاری کردووە .
هەروەها “دووھەمشیان خەڵاتی یادکردنەوەی کامەران دەبەخشرێتە خێزانی فۆتۆگرافەرێک کە لەکاتی کارەکەیدا بێسەروشوین بووە ، ئەمەش لەپێناو وننەکردنی ئەزموون و ژیانی ئەو سەربازە ونانەی کە بە زوومی کامێراکانیان خزمەتی مرۆڤایەتی و بەھا مرۆییەکانیان کردووە و ژیانیان بەخشیییەوە بە پیشەکەیان” .
ژمارەیەک دادوەریش کە پێکھاتوون لە کەسانی پسپۆڕو شارەزا ھەڵسەنگاندیان بۆ بابەتە پێشکشکراوکان کردووە و بێلایەنانە بڕیار لەوە دەدەن کێ دەبێتە براوەکانی خەڵاتی ئەمساڵ كە سبەینێ لە ڕێوڕەسمەکەدا ئاشکرادەکرێت .
خەڵاتی کامەران، بەناوی فۆتۆگرافەر و دامەزرێنەری ئاژانسی مێترۆگرافی کامەران نەجمەوە ناونراوە کە 12ی حوزەیرانی ساڵی 2014 لەکاتی ڕووماڵکردنی شەڕی نێوان هێزی پێشمەرگە و چەکدارانی تیرۆریستی داعش برینداربوو و تاوەکو ئێستاش بێسەروشوێنە.
خەڵاتی کامەران ئەمساڵ بۆ یەکەمجار سازدەکرێت و دەبێتە ڕێوڕەسمێکی ساڵانە و لەلایەن ئاژانسی مێترۆگرافیەوە زەمینە دەڕەخسێنرێت بۆ ھەموو ئەو فۆتۆگرافەر، ڤیدیۆگرافەر، ڕۆژنامەنووسانەی دەیانەوێت لە پیشەکەیاندا داھێنان بکەن و خزمەت بکەن، یاخود لە ڕێگای زوومی کامێراکانیان خزمەتی کۆمەڵگایان کردووە و بونەتە قوربانی و ژیان و ئەزموونیان بە بیردەھێنرێتەوە .
