بەپێی ئامارە ڕەسمییەكان هەڵاوسان لە ویلایەتە یەكگرتووەكان لە مانگی ڕابردوودا گەیشتووەتە 8.6%، ئەمەش بەرزترین ئاستە لە كانونی یەكەمی 1981ەوە.
ئامارەكانی وەزارەتی كاری ئەمریكا دەڵێت، نرخی بەكاربەر (پێنوێنی CPI) لە ویلایەتە یەكگرتووەكان بەڕێژەی 8.6% لە ئایاری 2022دا بەرزبووەتەوە بەراورد بە هەمان مانگی ساڵی ڕابردوو.
ئەم ئاستە بە بەرزترین دادەنرێت لە كانونی یەكەمی 1981ەوە، پێنوێنییەكە لە نیسانی ڕابردوو 8.3% بوو.
ئامارەكەی هەڵاوسان بەرزترە لە پێشبینییەكانی شارەزایان، ئەمەش ئاستی ئەو دۆخە دژوارە ئابورییە نیشاندەدات كە ویلایەتە یەكگرتووەكان ڕووبەڕووی دەبێتەوە.
شارەزایان كە پێشتر ئاژانسی بلۆمبێرگ ڕایانی وەرگرتبوو پێشبینی بەرزبوونەوەی نرخیان 8.3% لە ئاستی مامناوەنددا دیاریكردبوو.
هەڵاوسان چییە؟
دیاردەیەکی ئابورییە، تیایدا نرخی شمەک و کاڵاکان بۆ ئاستێکی زۆر بەرز دەبێتەوە، هۆکاری ئەمەش لەدەستدانی هێزی کڕینی دراوی نیشتمانییە و ئەمەش کاریگەرییەکی سلبی لەسەر ئابوریی وڵات دروستدەکات.
