زانایانی بۆشایی ئاسمان دەڵێن، هەردوو هەسارەی مشتەری و زوحەل لە 21ی كانونی یەكەمی داهاتوو لە یەكتر نزیكدەبنەوە، بە ئاستێكی گەورە كە لە نزیكەی 800 ساڵی ڕابردوودا ڕووینەداوە.
هەردوو هەسارەكە لە هاوینی ڕابردووەوە نزیكبوونەوەیان لە یەك دەستپێكردووە، پێشبینی دەكرێت لەكاتێكی داهاتوودا دەربكەون، لەئێستاشدا بۆشایی نێوانیان كەمترە لە ڕووبەری تەواوی مانگ.
بەپێی ڕۆژنامەی دەیلی مەیلی بەریتانی، هەردوو هەسارەكە دەگەنە ئەو پلەیە لە نزیكی، ڕاستەوخۆ دوای ئاوابوونی ڕۆژ، لەگەڵ هاتنی زستاندا لە 21ی كانونی یەكەمی داهاتوو.
چاوەڕوان دەكرێت ئەم دیمەنە بە چاوی ئاسایی لەهەر شوێنێكی هەسارەی زەوییەوە ببینرێت، بەڵام ئەوانەی لە هێڵی كەمەربەندی زەوین باشتر دەتوانن بیبینن.
هەردوو هەسارەكە جارێكی دیكە لە یەك نزیك نابنەوە تا ساڵی 2080، بەڵام ئەوكاتە لە خاڵێكی بەرزتردەبن لە زەوی، بینینیشیان بۆ ماوەیەكی زیاتر دەبێت.
دوای ئەوەش نزیكبوونەوەی هەردوو هەسارەكە بەو شێوەیە ڕووناداتەوە تا ساڵی 2400، واتە پاش چەندین سەدەی دیكە.
پاتریك هارتیگان، توێژەری زانستی بۆشایی ئاسمان لە زانكۆی ڕایس-ی ویلایەتی تەكساس وتی، نزیكبوونەوەی هەردوو هەسارەكە دەگمەنە.
ئەوشی وت، نزیكبوونەوەكەیان ڕوداوێكی تایبەتە، بەهۆی ئاستی ئەو نزیكبوونەوە زۆرە چاوەڕوانكراوەی كانونی یەكەمی داهاتوو.
بەوتەی ئەو هەردوو هەسارەكە وەك دوو مانگ لە 21ی كانونی دووەم دەردەكەون.
