عەلی حەمەساڵح، دوای ئەوەی پێدانی زەوی بە كوڕێكی وەزیری پێشمەرگە لە سلێمانی ئاشكراكرد، پەیامێكیشی بۆ میدیای پارتی نارد و دەڵێت، تەنها باسی ئەو زەوییەی سلێمانی مەكەن.
عەلی حەمەساڵح پەرلەمانتاری كوردستان لە تۆڕی كۆمەڵایەتیی فەیسبووك پەیامێكی بەناوی “بۆ میدیا و پەیجی پارتی” بڵاوكردووەتەوە، نووسیویەتی، “زەوییەكەی سلێمانی بڵاودەكەنەوە وەك ئەوەی لە هەولێر هیچ نەبێت”.
پەرلەمانتارەكە سێ زەویی هەولێری بە نمونە هێناوەتەوە كە براون و “بەهاكەیان 600 هێندەی زەویەکەی سلێمانیە”، ئەوانیش، “بەرامبەر فڕۆکەخانە 612 دۆنم، كە دەکرێتە ڤێلا و بەهای زەوییەکە یەک ملیار و 200 ملیۆن دۆلارە، شەش هەزار دۆنم بەناوی یاریگای گۆڵف، كە بەهاکەی 5 ملیار دۆلارە، هەروەها 200 دۆنم لە تەنیشت هۆتێل ڕۆتانا بەنایاسایی تاپۆکرا و بەهاکەی 521 ملیۆن دۆلارە!”.
دوێنێ عەلی حەمەساڵح پێدانی زەوییەكی بە كوڕی وەزیری پێشمەرگەی كوردستان ئاشكراكرد، كە لەسەر شەقامی شەست مەتریی سلێمانییە و بەهاكەی نزیكەی 14 ملیۆن دۆلارە.
كوڕەكەی وەزیری پێشمەرگە بەنیازە زەوییەكە بكاتە كافتریا.
دواتر وەبەرهێنانی هەرێمی كوردستان پرسەكەی بە ئاسایی وەسفكرد و ڕایگەیاند، “كوڕی وەزیری پێشمەرگەش وەكو هەر كەسێكی دیكە مافی ئەوەی هەیە وەبەرهێنان بكات”.
