بۆ پشتیوانی لە هەوڵەكانی بەرەنگاربوونەوەی ڤایرۆسی كۆرۆنای نوێ، حكومەتی ئەڵمانیا 10 ملیۆن یۆرۆ پێشكەشی عێراق دەكات و لە چوارچێوەیەدا پێنج نەخۆشخانە دروستدەكرێن كە یەكێكیان لە سلێمانی دەبێت.
باڵیۆزخانەی ئەڵمانیا لە عێراق ئەمڕۆ دووشەممە 23ی تشرینی دووەم لە ھەژماری تایبەتی خۆی لە فەیسبوک بڵاویكردەوە، دوێنێ بانکی پەرەپێدانی حکومەتی ئەڵمانیای فیدراڵ و بەرنامەی نەتەوە یەکگرتووەکان بۆ پەرەپێدان، بە ھاوبەشی لەگەڵ حکومەتی عێراق، ڕێکەوتننامەیەکیان واژووکردووە.
بەپێی ڕێککەوتننامەکە حکومەتی ئەڵمانیا 10 ملیۆن یۆرۆ بۆ پاڵپشتیکردنی ھەوڵەکانی بەرەنگاربوونەوەی ڤایرۆسی کۆرۆنای نوێ، پێشکەش بە حکومەتی عێراق دەکات.
بەپێی بڵاوكراوەكە، لەچوارچێوەی ئەو پاڵپشتییە دارییەدا، پێنج نەخۆشخانە لە ڕۆژئاوا و ڕۆژھەڵاتی پارێزگای بەغداد، بەسرە، موسڵ و سلێمانی بنیات دەنرێن.
ئەوەشی ڕوونكردوەتەوە لە پێنج ساڵی ڕابردوودا حکومەتی بەرلین 300 ملیۆن یۆرۆی لەڕێگای بەرنامەی نەتەوە یەکگرتووەکان بۆ پەرەپێدان پێشکەش بە حکومەتی عێراق کردووە.
