لیژنەی دەستپاكی پەرلەمانی كوردستان بەدواداچوون بۆ كێشەی دواكەوتنی مووچە لە سنووری پارێزگای سلێمانی دەكات و ئەندامێكی لیژنەكەش ڕایدەگەیەنێت، مووچەی مانگی پێنج گرفتی بۆ دروستنابێت، بەڵام ئەگەر كێشەكان چارەسەر نەكرێن و بەغداد 200 ملیارەكە نەنێرێت گرفتی مووچە سەرهەڵدەداتەوە.
بەڵێن ئیسماعیل، ئەندامی لیژنەی دارایی لە پەرلەمانی كوردستان لە كۆنگرەیەكی ڕۆژنامەوانییدا ڕایگەیاند، ئەمڕۆ چوارشەممە سەردانی سلێمانیمان كرد و لەگەڵ بەڕێوەبەری بانكی هەرێم و چەند لایەنێكی پەیوەندیدار كۆبوونەوەمان ئەنجامداوە و بەداخەوە كە ئێستا جۆرێك لە دوو ئیدارەیی پەیڕەودەكرێت و لە شێوازی مامەڵەكردن لە داهاتی نەوت و داهاتە ناوخۆییەكاندا و پێویستە ئەو گرفتانە چارەسەربكرێن.
ئاشكرایكرد، بۆ مووچەی مانگی پێنج داهاتی مانگەكانی پێشتر لەبەردەستە و گرفت دروستنابێت، بەڵام ئەگەر میكانیزمێك بۆ شێوازی كۆكردنەوەی داهاتەكان پەیڕەونەكرێن و بەغداد 200 ملیار دینارەكە نەنێرێت بەدڵنیاییەوە گرفتی مووچە سەرهەڵدەداتەوە.
