بافڵ جەلال تاڵەبانی، سەرۆكی یەكێتیی نیشتمانیی كوردستان لە ماڵی مام لە بەغداد پێشوازیكرد لە شاندی نوێنەرانی پەرلەمانتارە سەربەخۆكانی ئەنجومەنی نوێنەرانی عێراق.
لە كۆبوونەوەكەدا دەرباز كۆسرەت ڕەسوڵ، كارگێری مەكتەبی سیاسی و خالید شوانی ئەندامی مەكتەبی سیاسی ئامادەبوون، شاندی میوان ئامانجی سەردانەكەیان بۆ هەرێم و دەرئەنجامی دیدار و گفتوگۆكانیان لەگەڵ لایەنەكانی هەرێم و عێراق و دەستپێشخەرییان بۆ ڕزگاربوون لە قەیران و ئاستەنگەكانی ناو پڕۆسەی سیاسیی عێراق خستەڕوو و داوایان لە بافڵ جەلال تاڵەبانی كرد ڕۆڵێكی گرنگ و كاریگەری وەك سەرۆك مامجەلال بگێڕێت لە هێنانەكایەی زەمینەیەكی لەبارو گونجاو بۆ چارەسەركردنی كێشەكان و پەیڕەوكردنی سیاسەتێكی حەكیمانە.
ڕاشیانگەیاند، سەرۆك بافڵ و یەكێتیی نیشتمانیی كوردستان پێگەیەكی گەورە و كاریگەریان لە كۆكردنەوەی دژەكان و دەربازكردنی عێراق لەو دۆخە سیاسییە چەقبەستووەی تێیكەوتووە هەیە.
لە بەرامبەردا بافڵ جەلال تاڵەبانی ئامانجی سەردانەكەی بۆ بەغداد و كۆبوونەوەی لەگەڵ لایەنەكان بۆ شاندی میوان ڕوونكردەوە و ڕایگەیاند، “ئامانجی ئێمە ڕوون و ئاشكرایە و هەوڵەكانمان لە پێناو لێكتێگەیشتن و ڕێككەوتنێكی نیشتمانییە لەپێناو بونیادنانی حكومەتێكی خزمەتگوزار كە عێراق بەرەو كەناری سەقامگیری ببات”.
