دەسەڵاتدارانی بەندینخانەی بورج عەرەب لە ئەسكەندەرییەی میسر سزای لەسێدارەدانیان دەرهەق بە سێ برا جێبەجێكرد پاش تۆمەتباركردنیان بە كوشتنی دوو كەس و هەوڵدان بۆ كوشتنی یەكێكی دیكە.
ڕووداوەكە دەگەڕێتەوە بۆ حوزەیرانی ساڵی 2011 دوای ئەوەی هێزە ئەمنییەكان لە بۆرسەعید ئاگاداركردنەوەیەكیان پێگەیشت دەربارەی كوژرانی دوو كەس و برینداربوونی یەكێكی دیكە بە فیشەك، پاش گەیشتنی هێزە ئەمنییەكەش قوربانییان بۆ پزیشكی دادوەری و بریندارەكەش بۆ چارەسەر گوازرایەوە.
هۆكاری پشت ڕووداوەكە بوونی ناكۆكی بووە لەنێوان تۆمەتباری یەكەم و قوربانی یەكەم، تیایدا تۆمەتباری یەكەم بە پشت بەستن بە تۆمەتبارانی دیكە (براكانی) چەكیان هێناوە و پاش بینینی قوربانییان دەستڕێژی گولـلەیان لێكردوون.
بەهۆیەوە ڕێوشوێنی یاسایی بەرامبەر تۆمەتباران گیرایەبەر و دادگا بڕیاریدا بە سزادانیان بە لەسێدارەدان.
لە 17ی نیسانی 2021 دادگای پێداچوونەوە پاڵپشتی بۆ بڕیاری لەسێدارەدانی سێ براكە نیشاندا، بەر لەوەی سزاكە لەلایەن بەرپرسانی بەندینخانەی بورج عەرەبەوە جێبەجێبكرێت.
