سەرۆكی فەرەنسا ڕایدەگەیەنێت، گرنگە ڕوسیا بە ڕادەیەکی زۆر شەرمەزار نەکرێت بۆ ئەوەی بتوانرێت شەڕ لە ئۆکرانیا ڕابگیرێت و چارەسەرێکی دیپلۆماسی بدۆزرێتەوە.
ئیمانوێل ماکرۆن، سەرۆكی فەرەنسا لە چاوپێکەوتنێکدا لەگەڵ میدیاكانی وڵاتەكەی ڕایگەیاندووە، پاریس ڕۆڵی نێوەندگیری دەگێڕێت بۆ کۆتاییهێنان بە شەڕی ڕوسیا و ئۆكرانیا.
هەرچەندە ماکرۆن لە سەرەتای هێرشەكانی ڕوسیا بۆ سەر ئۆكرانیا بەردەوام لەگەڵ پوتین قسەی کردووە لە چێوەی هەوڵەکانی بۆ گەیشتن بە ئاگربەست و دەستپێکردنی دانووستانێکی باوەڕپێکراو لەنێوان کیێڤ و مۆسکۆدا، بەڵام تا ئێستا ئەوە نەهاتووەتە دی.
بۆیە ئەو دەڵێت،”نابێت ڕوسیا بە ڕادەیەکی زۆر شەرمەزار بکەین بۆئەوەی ڕۆژێک لە ڕۆژان شەڕەکە ڕابگیرێت و بتوانین بە ڕێڕەوێکی دیپلۆماسی لێی دەرچین”.
