بافڵ جەلال تاڵەبانی، سەرۆكی یەكێتیی نیشتمانیی كوردستان، لە ئەڵمانیا لەگەڵ جۆناسان پاوڵ، راوێژكاری ئاسایشی نەتەوەیی بەریتانیا كۆبووەوە.
لە كۆبوونەوەكەدا سەرۆك بافڵ لەسەر تەواوی پرس و رووداوەكانی هەرێمی كوردستان، عێراق و ناوچەكە هەڵوەستەیكرد و بۆچوون و ستراتیژی نیشتمانیی یەكێتی لە بەرامبەر پێشهاتەكان خستەڕوو و پشتیوانی تەواوی خۆی بۆ كەمكردنەوەی ئاستەنگەكان لەپێناو فەراهەمكردنی ئاسایش و ئارامی دەربڕی.
هەر لە كۆبوونەوەكەدا سەرۆك بافڵ جەلال تاڵەبانی دووپاتی لە گرنگی و پێویستیی بەرەوپێشبردنی پەیوەندیی دۆستانە و هاریكاریی نێوان هەرێمی كوردستان و عێراق لەگەڵ بەریتانیا كردەوە، بەجۆرێك كە خزمەت بە بەرژەوەندییە باڵاكانی هەردوولا و بەهێزكردنی ئاسایش و سەقامگیری لە ناوچەكەدا بكات.
پرسی رووبەڕووبوونەوی پاشماوەكانی تیرۆریستان و یەكخستنی هەوڵە سەربازییەكان تەوەرێكی تری دیدارەكە بوو كە بیروبۆچوونیان لەبارەوە ئاڵوگۆڕ كرا و تەئكید لەبەردەوامیی هەماهەنگییەكان و راوێژی بەردەوام كرایەوە بە ئاڕاستەی نەهێشتنەوەی هیچ دەرفەتێك بۆ جموجۆڵەكانی تیرۆريستان و زاڵبوون بەسەر ئاڵنگارییە ئەمنییەكاندا.
لەبەرامبەردا راوێژكاری ئاسایشی نەتەوەیی بەریتانیا پابەندبوونی وڵاتەكەی بە سەقامگیریی هەرێمی كوردستان و بەردەوامیی هاریكارییەكان دەربڕییەوە و رایگەیاند بەریتانیا بە گرنگییەوە لە پێگەی هەرێمی كوردستان دەڕوانێت و لە هەماهەنگییەكانیشمان بەردەوامدەبین.
