هێلاری كڵینتن دەڵێت، “پوتین حەزناكات ڕەخنەی لێبگیرێت، بە تایبەت لەلایەن ژنانەوە”.
هێلاری كڵینتن وەزیری پێشووتری دەرەوەی ئەمریكا، تێڕوانینێكی ڤلادیمێر پوتین سەرۆكی ڕوسیا لەبارەی ژنانەوە ئاشكرادەكات و دەڵێت، “پوتین ئەو كەسانەی خۆشناوێت كە ڕەخنەی لێدەگرن، بە تایبەت ژنان”.
بەپێی وتەی كڵینتن، سەرۆكی ڕوسیا بڕوایەكی ڕەهای بە خوودی خۆی هەیە، وەك ڕۆژنامەی “The Guardian” بڵاویكردووەتەوە و دەڵێت، هێلاری كڵینتن ئەو قسانەی دوێنێ هەینی لە فێستیڤاڵی ئەدەب و هونەر لە بەریتانیا كردووە.
لە ماوەی چەند هەفتەیەكدا ئەمە دووەم جارە هێلاری لەبارەی پوتین-ـەوە بدوێت، پێشتر ڕەخنەی لە سەرۆكی ڕوسیا گرتبوو بەوەی “سیاسەتی فراوانخوازیی خۆی ڕاناگرێت” و ڕوسیای بە هەڕەشە بۆ سەر ئەوروپا و سەقامگیریی جیهان ناوبردبوو.
