دوای نیو سەدە لە نووسین و چاپکردنی دەیان کتێب و ئامادەكردنی چەندین لێكۆڵینەوەی ئەدەبی و زمانەوانی، باری تەندروستیی عەزیز گەردی ناجێگیرە.
د. عەزیز گەردی، ئەدیب و نووسەر و ڕەخنەگرێکی ناوداری کوردە، ساڵی 1948 لە بەحرکەی پارێزگای هەولێر لەدایکبووە، تا ساڵی 2018 بەردەوامبوو لە نووسین، بەڵام ماوەیەکە باری تەندروستیی تێکچووە.
گەردی سەرەتای هەفتاکانی سەدەی ڕابردوو لە بەغدادەوە بڵاوکردنەوی نووسراو و دانراوەکانی دەستپێکردووە. دواتر چەندین وڵات گەڕاوە و بە درێژایی نیو سەدە، دەیان کتێب و لێکۆڵینەوەی نووسیوە و دەیانی تریشی لە زمانەکانی عەرەبی، فارسی، ئینگلیزی و فەرەنسییەوە وەرگێڕاوەتەسەر زمانی کوردی، کە بەشێک لەوانە شاکاری ئەدەبی جیھانیین.
ڕەوانبێژی لە ئەدەبی کوردی دا، کێشی شیعری کلاسیکیی کوردی، گەردەلوولی مەرگ، داغستانی من، ئەفسانەی سلاڤی، ئەگەر خۆر بمرێت و چیرۆکەکانی کریلۆڤ بەشێکن لە کتێبە نووسراو و وەرگێڕدراوەکانی عەزیز گەردی.
