ڕاپۆرتێكی ئەمریكی هۆشداری دەدات لەوەی زستانی ئەمساڵ قەیرانێكی گەورەی وزە و سووتەمەنی جیهان دەگرێتەوە.
تۆڕی هەواڵی سی ئێن ئێن ڕاپۆرتێكی لەبارەی وزەوە بڵاوكردووەتەوە، تیایدا شارەزایانی بوارەكە پێشبینیی سەرهەڵدانی قەیرانی وزە و سووتەمەنی دەكەن.
شارەزایانی ڕاوێژكار لە كۆمپانیای توێژینەوەی نەوتی نەرویجی “Rystad Energy” پێشبینی و هەڵسەنگاندنیان بۆ وزەی جیهان كردووە و بەپێی سی ئێن ئێن دەڵێن، لە كۆتایی ئەمساڵدا خواست لەسەر غازی سروشتی 26 ملیۆن تۆن زیاتر لەو خواستەی ئێستا هەیە زیاددەكات، ئەوەش دەكاتە 7%ی هەموو ئەو غازەی جیهان لە ساڵی ڕابردوودا بەكاریهێناوە.
هۆكارێكی سەرەكی بۆ پێشبینیكردنی سەرهەڵدانی قەیرانی وزە، سەرباری زۆربوونی خواست لەسەر غاز، هەوڵدانی وڵاتانی ئەوروپایە بۆ دەستبەرداربوونی غازی سروشتیی ڕوسیا و گەڕانیانە بەدوای سەرچاوەیەكی تری ئەو سووتەمەنییەدا.
شارەزایانی كۆمپانیا نەرویجییەكە ڕایانگەیاندووە، وڵاتانی ئەوروپا دەیانەوێت وێستگەی نوێی غاز دروستبكەن، بەڵام بەڵێندەران ناتوانن بە چڕیی كاربكەن بۆ ڕێگریكردن لە سەرهەڵدانی قەیرانی وزە و بەوەش لە زستانی ئەمساڵدا قەیرانەكە سەرهەڵدەدات.
