ئەنجومەنی نوێنەرانی عێراق، بە كۆی دەنگ پڕۆژە یاسای بە تاواندانانی ئاساییكردنەوەی پەیوەندی لەگەڵ ئیسرائیلی پەسەندكرد.
ئەمڕۆ پێنجشەممە ئەنجومەنی نوێنەرانی عێراق كۆبووەوە و بە كۆی دەنگی پەرلەمانتارانی ئامادەبوو، پڕۆژە یاسای بە تاواندانانی ئاساییكردنەوەی پەیوەندی لەگەڵ ئیسرائیلی پەسەندكرد كە لەلایەن موقتەدا سەدر و پەرلەمانتارانی ڕەوتەكەیەوە ئامادە و پێشكەشكرابوو.
بەپێی یاساكە، هیچ كەس و لایەنێكی عێراقی لە ناوەوە و دەرەوەی عێراق و ئەو بیانییانەشی نیشتەجێی عێراقن، مافی ئەوەیان نییە هیچ جۆرە پەیوەندییەكی كۆمەڵایەتی، كەلتووری، سیاسی، بازرگانی و ئابوری لەگەڵ ئیسرائیلدا دابمەزرێنن.
دوای پەسەندكردنی پڕۆژە یاساكە، موقتەدا سەدر ڕێبەری ڕەوتی سەدر پەیامێكی بڵاوكردەوە و سوپاسی خودای كرد لە پای وەك خۆی دەڵێت، “سەرشۆڕشكردنی ئیسرائیلییە تیرۆریستەكان” و داوای لە عێراقییەكان كرد نوێژی سوپاسگوزاری بكەن و بڕژێنە سەر شەقامەكان و ئاهەنگبگێڕن.
