زانکۆی پۆلیتەکنیکی سلێمانی ڕایگەیاند، بەهۆی بەردەوامبوونی خۆڵبارین و ڕێنماییە تەندروستییەکان دەوامی زانکۆکە ڕادەگیرێت.
لە ڕاگەیەندراوێکدا زانکۆی پۆلیتەکنیک بڵاویکردەوە، بەهۆی ئەو شەپۆلی خۆڵبارینەی هەرێمی کوردستان بەگشتی و پارێزگای سلێمانی، هەڵەبجە و ئیدارەی گەرمیانی گرتووەتەوە و بەمەبەستی پاراستنی تەندروستی و سەلامەتیی خوێندکاران و فەرمانبەران و مامۆستایان بریاڕیان دا بە ڕاگرتنی دەوام.
لە ڕاگەیەندراوەکەدا هاتووە، بڕیاری دەوام بەپێی ئەو دەسەڵاتانەیە کە پێیاندراوە و بەپشتبەستن بە ڕێنماییە تەندرووستییەکانی وەزارەتی تەندرووستیی هەرێم و ناوەند و زانیارییە کەشناسییەکانە کە ئەمڕۆش خۆڵبارین بەردەوام دەبێت.
بڕیارەکە سەرجەم کۆلێژ و پەیمانگاکان و دامەزراوەکانی زانکۆی پۆلیتەکنیکی سلێمانی لە سنووری پارێزگای سلێمانی و هەڵەبجە و ئیدارەی گەرمیان دەگرێتەوە.
سەبارەت بە تاقیکردنەوەکانیش دەسەڵات دەداتە ئەنجومەنی کۆلێژ و پەیمانگاکان بە گونجاندنی خشتەی تاقیکردنەوەکان لەگەڵ ئەم بڕیارەی ڕاگرتنی دەوام.
