لە نامەیەكدا كە ئاراستەی باڵیۆزخانەی بەریتانیای كردووە پەرلەمانتارێكی كورد داوادەكات شانشینی یەكگرتوو لە ناردنەوەی كۆچبەران پاشگەزببێتەوە و ترسی خۆیشی لەوبارەیەوە دەخاتەڕوو.
عەلی حەمەساڵح، ئەندامی پەرلەمانی كوردستان نامەیەكی فەرمی ئاراستەی باڵیۆزخانەی بەریتانیا لە عێراق كردووە و تیایدا دەڵێت، دوای بیستنی هەواڵی دیپۆرتکردنەوە و ناردنەوەی کۆچبەرانی کورد لە بەریتانیا، ئەم هەواڵە نیگەرانی و دڵەڕاوکێی لە شەقامی هەرێمی کوردستان دروستكردووە.
وەك یەكێك لە نوێنەرانی گەل ئەو پەرلەمانتارە دڵتەنگی خۆی دەردەبڕێت و داواش لە حکومەتی بەریتانیا دەكات لە “هەوڵی ناردنەوەی بە زۆری پەنابەرانی کورد پاشگەزببێتەوە”.
عەلی حەمەساڵح دەشڵێت، “بێکاری و نادادپەروەری و نزمیی کوالێتیی ژیان لە هەرێمی کوردستان وایکردووە خەڵک لە وڵاتەکەیان هەڵبێن و پەنا بۆ بەریتانیا ببەن”.
هاوكات لە پەیامێكیشدا ترسی خۆی نیشاندەدات بەوەی ناردنەوەكە ببێتە پڕۆسەیەکی بەردەوام و وڵاتانی دیکەش پەیڕەوی بکەن.
