حكومەتی عێراق بڕیاریداوە خزمەتگوزاریی ئینتەرنێتی خۆڕایی بۆ ئەو ژنانە دابینبكات كە خێزانەكانیان دەژێنن.
پڕۆژەكە وەزارەتی كار و كاروباری كۆمەڵایەتی جێبەجێیدەكات و ڕێككەوتنی لەگەڵ كۆمپانیاكانی پەیوەندیكردندا كردووە و دەڵێت، “ئەو ژنانەی بژێویی خێزانەكانیان لەئەستۆگرتووە و ئەوانەی سوودمەندن لە مووچەی ژنانی بێهاوسەر، بەبێ بەرامبەر خزمەتگوزاریی ئینتەرنێتیان بۆ دابیندەكرێت”.
هودا سەجاد مەحموود سەرۆكی دەستەی پاراستنی كۆمەڵایەتیی عێراق ڕایگەیاند، ئەو ژنانەی مووچەی تۆڕی پاراستنی خێزان وەردەگرن و منداڵی خوێندكاریان هەیە و پێویستییان بە ئینتەرنێتە، خزمەتگوزارییەكەیان بۆ دابیندەكرێت و هەوڵدەدەن ئامێری تابلێت بدەن بە منداڵە خوێندكارەكانیان وەك هاندانیان بۆ بەردەوامبوون لە خوێندن.
بەپێی وتەی هودا سەجاد، لەگەڵ كۆمپانیاكانی ئاسیا سێڵ و كۆڕەك و زەین-دا ڕێككەوتنیان كردووە بۆ دابینكردنی خزمەتگوزارییەكە بۆ ئەو خێزانانە.
