نرخی بەنزین لە بەنزینخانەكانی شاری سلێمانی گرانبووە و سەرجەم جۆرەكانی بەنزین لەمشەوەوە 50 دینار چووەتەسەر نرخەكەی.
ئازاد محەمەد ئەمین، سەرۆكی ئەنجومەنی پارێزگای سلێمانی لەلێدوانێكدا بە تۆڕی میدیایی ئێستای ڕایگەیاند، نرخی سەرجەم جۆرەكانی بەنزین لە ئێوارەی ئەمڕۆ پێنجشەممەوە گرانبووە و سەرجەم جۆرەكانی بەنزین 50 دینار چووەتەسەر نرخەكەی و هۆكارەكەشی پەیوەندی بەوەوە هەیە كە چەند ڕۆژێك پێش جەژنی ڕەمەزان بەنزینی 690 دیناری نەنێردراوە بۆ سلێمانی .
ئاشكرایكرد، بڕی ئەو بەنزینەی لە كۆماری ئیسلامیی ئێرانەوە هاوردە دەكرێت كەمبووەتەوە و لە توركیاش نرخەكەی گرانە ئەو بڕە بەنزینەی لە عەمبارەكان هەڵگیرابوون تەواوبوون.
سەرۆكی ئەنجومەنی پارێزگای سلێمانی باسی لەوەكرد، “بەنزینی نۆڕماڵ بە 910 دینار وەردەگیرێت و بەنزینخانەكان بە 950 دینار دەیفرۆشن و جۆرەكانی دیكەش سەرجەمیان گرانبوون”.
