لە چێوەی ئاساییكردنەوەی پەیوەندییەكانیان بڕیارە وەزیرانی دەرەوەی سعودیە و ئێران لە بەغداد كۆببنەوە.
ئاژانسی فارس نیوز لەزاری جەواد کەریمی پەرلەمانتاری ئێران گواستویەتیەوە، بڕیارە حوسێن ئەمیر عەبدولهیان، وەزیری دەرەوەی ئێران و فەیسەڵ بن فەرحان، وەزیری دەرەوەی سعودیە لە بەغدادی پایتەختی عێراق کۆبنەوە.
باسی لەوەشكردووە، “بەمنزیکانە لە چێوەی پرۆسەی دانووستانەکانی ئاساییکردنەوەی پەیوەندییەکانی تاران و ڕیاز، عەبدولهیان و بن فەرحان لە بەغداد كۆدەبنەوە و کردنەوەی باڵیۆزخانەکان و پرسە هەرێمییەکان و قەیرانی یەمەن تاوتوێدەکەن”.
عێراق ماوەی زیاتر لەساڵێكە نێوەندگیریی نێوان تاران و ڕیاز دەكات، بۆ ئەوەی پەیوەندییەکانی نێوان هەردوو وڵاتی دراوسێ ئاسایی بکاتەوە و پێشتریش چەند كۆبوونەوەیەكی نێوان ئەو دوو وڵاتە لە ئاستی جیاجیادا لە بەغدادی پایتەخت ئەنجامدراوە.
