سەرۆکی ئەنجومەنی پارێزگای سلێمانی بێئاگایی ئەنجومەنەکەی لە کۆبوونەوەی نێوان سەرۆکی حکومەت و پارێزگارەکانی سلێمانی و هەڵەبجە ڕاگەیاند و وتی، “زانیارییەکان لە هەولێرن و ئێمە ئاگاداری هیچ نین لەوبارەیەوە”.
لە لێدوانێکدا بۆ تۆڕی میدیایی ئێستا، ئازاد محەمەد ئەمین سەرۆکی ئەنجومەنی پارێزگای سلێمانی ڕایگەیاند، هیچ زانیارییەک لەبارەی کۆبوونەوەی سەرۆکی حکومەت و پارێزگارەکانی سلێمانی و هەڵەبجە و سەرپەرشتیارانی ئیدارە سەربەخۆکانی ڕاپەڕین و گەرمیان نەدراوە بە ئەنجومەنەکە، چ لەبارەی کاتی کۆبوونەوەکە چ لەبارەی شوێن و شێوازی کۆبوونەوەکە.
سەرۆکی ئەنجومەنی پارێزگای سلێمانی وتی، “ئێمە ئاگامان لەو کۆبوونەوەیە نییە، زانیارییەکان لە هەولێرن نەک لای ئێمە”.
ئازاد محەمەد ئەمین ڕەتیشیكردەوە كێشە لە كۆكردنەوەی داهاتی هەرێمی كوردستاندا هەبێت، لەكاتێكدا سەرۆكی حكومەت داوای ڕوونكردنەوە لە بەرپرسانی سنوورەكە دەكات لەبارەی داهاتەوە.
جەختیکردەوە، داهاتی سنووری پارێزگای سلێمانی بەوپەڕی شەفافییەوە دەچێتە بانکی ناوەندیی سلێمانی، بەڵام داهاتی سنوورەکە خۆی هەر کەمە و ئێستا لەبەر چەند هۆکارێک کەمتریش بووەتەوە.
بڕیارە ئەمرۆ مەسرور بارزانی سەرۆكی حكومەت و قوباد تاڵەبانی جێگری سەرۆكی حكومەت، لەبارەی پرسی داهاتەوە، لەگەڵ هەریەكە لە پارێزگارەكانی سلێمانی و هەڵەبجە و هەروەها سەرپەرشتیارانی ئیدارەكانی گەرمیان و ڕاپەرین كۆببنەوە.
لە چەند ڕۆژی ڕابردوودا مەسرور بارزانی لە كۆنگرەیەكی ڕۆژنامەوانیدا بێئاگایی خۆی لە دواكەوتنی مووچە و هۆكاری كەمیی داهاتی سلێمانی ڕاگەیاند، بۆیە داوایكرد لەگەڵ بەرپرسانی سلێمانیدا كۆببێتەوە و پرسەكانی بۆ ڕوونبكەنەوە.
لە بەرامبەردا یەكێتی و چەند پەرلەمانتارێكی دیكەش هۆكارەكانی كەمبوونەوەی داهاتی سلێمانییان ڕوونكردووەتەوە، كە بەشێكیان پەیوەندیی بە بردنەوەی باج و ڕسوماتەوە هەیە لە سلێمانییەوە بۆ هەولێر، ئەمە جگە لەوەی سلێمانی ئاڵوگۆڕی بازرگانیی تەنها لەگەڵ ئێراندا هەیە، لەكاتێكدا هەولێر و دهۆك لەگەڵ سێ وڵاتدا سنوور و ئاڵوگۆڕیان هەیە.
