بەڕێوەبەر و کارمەندانی کۆمپانیای ئەپڵ پەیام دەنێرن و دەستلەکاردەکێشنەوە، چونکە نایانەوێت بگەڕێنەوە سەر کار و خوازیارن بە “ئۆنلاین” و لە ماڵەوە کارەکانیان بکەن.
پاش دامرکانەوەی شاڵاوەکانی کۆرۆنا، کۆمپانیاکە داوای لە کارمەندەکانی کردووە بگەڕێنەوە شوێنکارەکانیان و چیدی لە ماڵەوە کارنەکەن، بەڵام بەشێکی کارمەندەکان لەم داوایە ڕازی نین و گروپێکی بەرەنگارییان پێکهێناوە بە ناوی “ئەپڵ پێکەوە”ـوە و داواکارییان ئەوەیە ڕێگەیان بدرێت لە ماڵی خۆیانەوە کارەکانیان بکەن.
گرووپەکە پەیامێکی کراوەیان ئاراستەی کارگێڕیی کۆمپانیاکە کردووە و تێیدا چەند هۆکارێکیان خستووەتەڕوو، کە بۆچی باشترە چیدی نەگەڕێنەوە شوێنی کار.
یەکێک لە هۆکارەکان قەرەباڵغیی ئەو شوێنانەیە کە لقەکانی کۆمپانیاکەیان لێن، وەک لۆس ئەنجلس و ناوچەی ئۆستن لە تێکساس، کە بەهۆی ترافیکەوە کاریگەریی خراپیان لەسەر ژیان و تواناکانی کارمەندان هەیە.
لە پەیامەکەدا ڕوونکراوەتەوە، یەکێک لە خاڵەکانی بەهێزیی بەرهەمەکانی ئەپڵ، وەک “ئای فۆن” و “ئای پاد”، ئەوەیە کارئاسانییەکی گەورەن بۆ کارمەندانێک کە بیانەوێت لە دوورەوە و بە ئۆنلاین کارەکانیان بەجێبگەیەنن، بەڵام بەرهەمهێنەری ئەم ئامێرانە خۆی لە بنەڕەتدا ناهێڵێت کارمەندەکانی لێیان سوودمەند ببن، بەوەی دەیانگێڕێتەوە سەر کار.
لە درێژەیی ئەم ناڕەزایەتییانەدا و لەژێر کاریگەریی ئەم گرووپەدا، چەندین کارمەند دەستیانلەکارکێشاوەتەوە.
بەپێی پێگەی “ڤێرج”، دیارترینی ئەوانەی بەم هۆیەوە ئەپڵ بەجێدەهێڵن، یان گودفێلۆ بەڕێوەبەری بەشی “فێربوونی میکانیکی”ـە.
