دیڤۆک ئۆریگیی هێرشبەری بەلجیکی یانەی لیڤەرپوڵ ئیدارەی یانەکەی لە ویستی یاریکردنی بۆ یانەی ئەی سی میلان ئاگادار کردووەتەوە.
بەپێی زانیارییەکانی “تریبونا”، ئیدارەی یانەی ئەی سی میلان و لێپرسراوی کارەکانی دیڤۆک ئۆریگی کار لەسەر وردەکاریی گرێبەستی نێوانیان دەکەن، کە بڕیارە لە مێرکاتۆی هاوینی 2022 واژۆ بکرێت.
لە بەرامبەردا یاریزانەکە داوای لە ئیدارەی “ڕێدز” کردووە لە کۆتایی وەرزدا ئاسانکاری بۆ بکەن تاوەکو پەیوەندی بە میلانەوە بکات، بە و پێیەی ئیدارەی لیڤەرپوڵ پێشوەخت بەوەیان زانیوە کە یاریزانەکە لەگەڵ یانەی ئەی سی میلان لە سەرهێڵە.
بڕیارە گرێبەستی نێوان میلان و ئۆریگی بە مووچەی ساڵانەی چوار ملیۆن یورۆ واژۆ بکرێت، ماوەی گرێبەستەکەشی بۆ ماوەی چوار وەرز دەبێت.
ئۆریگی تەمەن 27 ساڵ لەم وەرزەدا لە کۆی خول و پاڵەوانێتییەکان 16 یاریی بۆ لیڤەرپوڵ کردووە، تەنها شەش گۆڵی تۆمار کردووە.
