خۆپیشاندان دژ بە گرانی لە ناوچە جیاجیاکانی ئێران و ڕۆژهەڵاتی کوردستان بەردەوامە و کوژراو، بریندار و چەندین دەستگیرکراو هەن.
سەرچاوەکان ئاماژەیان بەوەداوە، لە چەندین جێگە گرژی و پێکدادان لەنێوان خۆپیشاندەران و هێزە ئەمنییەکاندا دروستبووە و تا ئێستا 3 کەس لە شارە جیاجیاکان بوونەتە قوربانی.
بەپێی ڕاپۆرتەکان، لە درێژەی خۆپیشاندانەکاندا تا ئێستا زیاتر لە 4 بریندار و 25 دەستگیرکراو هەن.
لە چەند ڕۆژی ڕابردوودا خۆپیشاندان بە ناوچە جیاجیاکانی ئێران و ڕۆژهەڵاتی کوردستاندا دژ بە گرانیی خۆراک و شتومەک بڵاوبووەوە و خەڵک بە دروشمەوە ڕژانە سەر شەقامەکان، لە لایەکی دیکەشەوە بارودۆخەکە لە چەند ناوچەیەک تاڵانکردنی فرۆشگاکانی لێکەوتەوە.
پێشتر حکومەتی ئێران لە بڕیارێکی نوێدا ڕایگەیاندبوو، نرخی چەند خۆراکێکی سەرەتایی دەگۆڕدرێت لەڕێی لێبڕینی هاوکارییە خۆراکییەکانیانەوە، هەروەها نرخی گەنم و جۆش دەگۆڕدرێن بەپێی ئەو بەرهەمانەی لێیان درووستدەکرێت، ئەمەش بووە هۆی بەرزبوونەوەیەکی توند لە نرخی نان و پێکهێنەرە سەرەکییەکانی سفرەی هاوڵاتییاندا.
پاش ئەم بڕیارە، ڕاستەوخۆ نرخی ڕۆنی چێشتلێنان بۆ 4 هێندە زیادیکرد و مریشک و هێلکەش بۆ زیاتر لە 2 هێندە.
جێی ئاماژەیە، هەر لەم ماوەیەدا نرخی نان بووەتە 5 هێندەی مانگی پێشوو، “بابۆڵە” و خواردنە خێراکانی دەرەوەش بۆ زیاتر لە 10 هێندە گران بوون.
