محەمەد بن زاید ئال نهیان بە سەرۆكی نوێی ئیمارات هەڵبژێردرا و جێگەی براكەی گرتەوە.
كەمێك لەمەوبەر ئەنجومەنی باڵای یەكێتیی میرنشینە یەكگرتووەكانی عەرەب، بە سەرۆكایەتیی محەمەد بن ڕاشد ئال مەكتوم جێگری سەرۆكی وڵات و سەرۆك وەزیران و فەرمانڕەوای دوبەی كۆبووەوە و سەرۆكی نوێی وڵاتەكەی هەڵبژارد.
سەرۆكی نوێی ئیمارات محەمەد بن زاید ئال نهیان-ـە و برای خەلیفە بن زاید ئال نهیان سەرۆكی پێشووی ئیماراتە كە دوێنێ هەینی لە تەمەنی 73 ساڵیدا كۆچی دواییكرد.
محەمەد بن زاید ئال نهیان كە سێیەم سەرۆكی ئیمارات و كوڕی شێخ زاید یەكەم سەرۆكی وڵاتەكەیە، دەرچووی ئەكادیمیای ساندهێرستی سەربازیی شاهانەی بەریتانییە، فەرمانڕەوای میرنشینی ئەبوزەبی و فەرماندەی باڵای هێزە چەكدارەكانی وڵاتەكەیەتی و پێشتر لە هێزی ئاسمانیی ئیمارات-دا فڕۆكەوان بووە.
