سەرۆكی هاوپەیمانیی دەوڵەتی یاسا ڕایدەگەیەنێت، ئەنجومەنی نوێنەرانی عێراق دەیەوێت بانگێشتی ژمارەیەك لە وەزیرەكانی حكومەت بكات و متمانەیان لێوەربگرێتەوە و دەڵێت “ئەو هەنگاوە پێشێلكاری یاسایە”.
نوری مالیكی، سەرۆكی هاوپەیمانیی دەوڵەتی یاسا بڵاویكردووەتەوە، ئەنجومەنی نوێنەرانی ئێستا بە نیازە ژمارەیەك لە وەزیرەكانی حكومەت بانگێشت بكات و متمانەیان لێوەربگرێتەوە و متمانە بە چەند وەزیرێكی نوێ بدات.
مالیكی دەڵێت،”ئەگەر ئەو هەنگاوە لە ئەنجومەنی ئەنجامبدرێت پێشێلكردنی یاسایە و ئەو پەرلەمانە دەنگی بە پێكهێنانی ئەو حكومەتە نەداوە تا ئێستا بانگێشتی بكات و لێپێچینەوەی لەگەڵدا بكات”.
لە چەند ڕۆژی ڕابردوودا 105 واژوو كۆكرابووەوە بۆ سەندنەوەی متمانە لە مونهل خەباز، وەزیری پیشەسازی و بریكارەكەی كە تێوەگلاون بە گەندەڵی و تەواوی بەڵگەكان لە دادگا و دەستەی نەزاهەوە ئامادەكراون.
