برایان جۆنسۆن ناوسراو بە “پاشای جگەر” پسپۆڕ و پزیشکەکانی سەرسامکردووە بەوەی بە خواردنی گۆشتی کاڵ دەژی و پاڵەوانی لەشجوانییە، چەندین کاری ئەستەم و نەکردە لەو ڤیدیۆیانەدا ئەنجامدەدات کە لە تۆڕە کۆمەڵایەتییەکاندا بڵاویاندەکاتەوە.
ڕۆژانە نزیکی کیلۆیەک جگەر بە کاڵی دەخوات، نازناوەکەشی لەم کارەیەوە هاتووە.
برایان جۆنسۆن-ی 45 ساڵ لەناو هەوادارانیدا بە “پاشای جگەر” ناسراوە، پاڵەوانی وەرزش و لەشجوانییە و تەنیا گۆشتی کاڵ دەخوات.
ئەو لە ڤیدیۆی تۆڕە کۆمەڵایەتییەکانیدا خەڵکانێکی زۆری سەرسامکردووە، کاتێک بە ددان کێشی قورس ڕادەکێشێت، کاری قورس و وەزشی سەخت دەکات و پەیامی بۆ جەماوەرەکەی ئەوەیە، ژیانی نوێ مرۆڤەکانی ناسککردووەتەوە و پێویستە بگەڕێنەوە بۆ ژیانی ڕەسەنی خۆیان، واتە وەک پێشینان گۆشتی کاڵ بخۆن و جەستەیان بخەنە ژێر باری جموجووڵ و ڕەنجە قورسەکانی ژیانی ڕۆژانەوە.
لەڕێی بانگەشەکردن بۆ ئەم شێوازی ژیانەوە، هەروەها لەڕێی ماسوولکەکانیەوە و خواردنی چەندان کیلۆ گۆشت بەکاڵی لەبەردەم کامێرادا، پاشای جگەر لە ئێستادا خاوەنی مارکەی تایبەتی تەواوکەرە خۆراکییەکان و کۆمپانیای خۆیەتی.
